વોશિંગ્ટન, તા. 31 જાન્યુઆરી : અમેરિકન ન્યાય વિભાગ દ્વારા જેફ્રી એપસ્ટાઈન કેસ સંબંધિત દસ્તાવેજો જાહેર કરવામાં આવતા બ્રિટનના વર્તમાન રાજા ચાર્લ્સ તૃતીયના સગા ભાઈ પ્રિન્સ એન્ડ્રુ માઉન્ટબેટન-વિન્ડસર ફરી એકવાર ગંભીર વિવાદોના વમળમાં ફસાયા છે. આ ફાઈલોમાં પ્રિન્સ એન્ડ્રુની અત્યંત આપત્તિજનક તસવીરો અને તેમની તથા જેફ્રી એપસ્ટાઈન વચ્ચે થયેલા ઈમેલ સંવાદોએ બ્રિટિશ રાજવી પરિવારની પ્રતિષ્ઠાને મોટો ફટકો માર્યો છે.
સનસનીખેજ તસવીરોનો ખુલાસો
જાહેર કરાયેલા દસ્તાવેજોમાં પ્રિન્સ એન્ડ્રુની ત્રણ એવી તસવીરો સામેલ છે જે હોશ ઉડાવી દે તેવી છે. આ તસવીરોમાં એન્ડ્રુ સફેદ પોલો શર્ટ અને જીન્સ પહેરીને નગ્ન પગે દેખાય છે. એક તસવીરમાં તેઓ જમીન પર લેટેલી એક મહિલા (જેનો ચહેરો છુપાવવામાં આવ્યો છે) ઉપર ચારેય હાથ-પગ વડે ઝૂકેલા જોવા મળે છે, જ્યારે બીજી તસવીરમાં તેમનો હાથ મહિલાના પેટ પર છે. આ તસવીરો ક્યારની છે તેની ચોક્કસ માહિતી નથી, પરંતુ તેમાં રૂમમાં અન્ય એક વ્યક્તિ પણ જોવા મળે છે.
બકિંગહામ પેલેસમાં ગુપ્ત ડિનરનું આયોજન
ઓગસ્ટ 2010ના ઈમેલ સંવાદો પરથી જાણવા મળ્યું છે કે પ્રિન્સ એન્ડ્રુએ સજા કાપીને બહાર આવેલા જેફ્રી એપસ્ટાઈનને બકિંગહામ પેલેસમાં ડિનર માટે આમંત્રણ આપ્યું હતું. એન્ડ્રુએ ઈમેલમાં ‘પ્રાઈવસી’ (ગોપનીયતા)ની ખાતરી આપતા લખ્યું હતું કે પેલેસમાં કોઈ ખલેલ પહોંચશે નહીં. આ જ સમયગાળામાં એપસ્ટાઈને એન્ડ્રુને એક 26 વર્ષીય સુંદર અને વિશ્વાસુ રશિયન યુવતી સાથે મુલાકાત કરવાની ઓફર પણ કરી હતી. એન્ડ્રુએ આ મુલાકાત માટે ભારે ઉત્સુકતા દર્શાવી હતી.
પરિવારના અન્ય સભ્યોના નામ પણ ખૂલ્યા
માત્ર એન્ડ્રુ જ નહીં, પરંતુ તેમની પૂર્વ પત્ની સારા ફર્ગ્યુસન (ડચેસ ઓફ યોર્ક) અને તેમની પુત્રીઓના નામ પણ દસ્તાવેજોમાં જોવા મળ્યા છે. સારા ફર્ગ્યુસને પોતાનું દેવું ચૂકવવા માટે જેફ્રી એપસ્ટાઈન પાસેથી મોટી આર્થિક મદદ લીધી હોવાનું બહાર આવ્યું છે. સારાએ એક ઈમેલમાં એપસ્ટાઈનને ‘પોતાને જોઈતો હતો તેવો ભાઈ’ અને ‘લેજન્ડ’ કહીને સંબોધ્યો હતો. આ સિવાય એપસ્ટાઈનની સાથીદાર ગિલેન મેક્સવેલ સાથે પણ પ્રિન્સ એન્ડ્રુના ઘનિષ્ઠ સંબંધો હોવાનું ઈમેલ પરથી સાબિત થાય છે.
પ્રિન્સ એન્ડ્રુનું પતન
વર્ષ 2019માં વર્જિનિયા ગફ્રે દ્વારા સગીર વયે શોષણના આરોપો અને ત્યારબાદ બીબીસીના વિવાદાસ્પદ ઈન્ટરવ્યુ બાદ એન્ડ્રુની છબી પહેલેથી જ ખરડાયેલી હતી. 2022માં મહારાણી એલિઝાબેથ દ્વારા તેમની સૈન્ય ઉપાધિઓ અને ‘હિઝ રોયલ હાઈનેસ’નું સંબોધન પાછું ખેંચી લેવામાં આવ્યું હતું. હવે આ નવી તસવીરો અને ઈમેલ સામે આવ્યા બાદ પ્રિન્સ એન્ડ્રુ માટે જાહેર જીવનમાં પરત ફરવાના તમામ રસ્તાઓ બંધ થઈ ગયા હોવાનું મનાય છે.