નવી દિલ્હી :ભારતીય ઓટોમોબાઈલ માર્કેટમાં એસયુવી સેગમેન્ટમાં પોતાની પકડ મજબૂત કરવા માટે જર્મન કાર ઉત્પાદક ફોક્સવેગન હવે સક્રિય બની છે. કંપનીએ પુષ્ટિ કરી છે કે તે સ્કોડા કાયલાક જેવી કારને ટક્કર આપવા માટે ચાર મીટરથી નાની (સબ-૪ મીટર) એસયુવી લોન્ચ કરવાની યોજના બનાવી રહી છે. 
અહેવાલો મુજબ, આ નવી એન્ટ્રી-લેવલ એસયુવી ૨૦૨૭ના મધ્ય સુધીમાં ભારતીય બજારમાં લોન્ચ કરવામાં આવશે. અગાઉ ફોક્સવેગન પ્રીમિયમ સેગમેન્ટ પર ધ્યાન કેન્દ્રિત કરવા માંગતી હતી, પરંતુ સ્કોડા કાયલાકની લોકપ્રિયતા અને ઈલેક્ટ્રિક વાહનોમાં થઈ રહેલા વિલંબને કારણે કંપનીએ પોતાની વ્યૂહરચના બદલી છે.
આ નવી એસયુવી ફોક્સવેગન ટાઈગુન અને સ્કોડા કુશાકવાળા પ્લેટફોર્મ પર જ આધારિત હશે, પરંતુ તેની ડિઝાઈન સંપૂર્ણપણે અલગ અને ફોક્સવેગનની આગવી ઓળખ સમાન હશે. તેમાં સ્લીક હેડલેમ્પ્સ, પહોળો એર ડેમ અને સ્પોર્ટી બમ્પર જોવા મળી શકે છે. એન્જિનની વાત કરીએ તો, તેમાં ૧.૦-લીટરનું ટીસીઆઈ ટર્બો પેટ્રોલ એન્જિન આપવામાં આવે તેવી શક્યતા છે, જે ૧૧૫ પીએસ પાવર જનરેટ કરશે. આ ઉપરાંત, તેમાં નવું ૮-સ્પીડ ઓટોમેટિક ટ્રાન્સમિશન પણ જોવા મળી શકે છે, જે હાલના ગિયરબોક્સ કરતા વધુ કાર્યક્ષમ હશે.