ચંદીગઢ: પંજાબના વિકાસ અને ધાર્મિક આસ્થાને સન્માન આપવા માટે વડાપ્રધાન નરેન્દ્ર મોદી આવતીકાલે એટલે કે ૧ ફેબ્રુઆરી, ૨૦૨૬ના રોજ પંજાબની મુલાકાત લેવાના છે. આ મુલાકાત દરમિયાન તેઓ રાજ્યને ઉડ્ડયન ક્ષેત્રે બે મોટી ભેટ આપશે. જલંધરના આદમપુર એરપોર્ટનું નામ બદલીને મહાન સંત અને સમાજ સુધારક 'શ્રી ગુરુ રવિદાસ જી' એરપોર્ટ કરવાની સત્તાવાર જાહેરાત વડાપ્રધાનના હસ્તે કરવામાં આવશે.
સંત રવિદાસ પ્રત્યે આદર અને દલિત સંપર્ક
ગુરુ રવિદાસની ૬૪૯મી જન્મજયંતિના પવિત્ર અવસરે આદમપુર એરપોર્ટનું નામકરણ તેમના નામ પર કરીને કેન્દ્ર સરકારે એક મોટો સંદેશ આપ્યો છે. વડાપ્રધાન બલ્લાન ગામના 'ડેરા સચ ખંડ બલ્લાન'ની મુલાકાત લેશે અને પદ્મશ્રી સન્માનિત સંત નિરંજન દાસ સાથે મુલાકાત કરશે. ૨૦૨૭ની પંજાબ વિધાનસભા ચૂંટણીઓ પહેલા પીએમની આ મુલાકાત રાજકીય રીતે પણ અત્યંત મહત્વની માનવામાં આવે છે, જે ભાજપના દલિત સમુદાય તરફના મજબૂત સંપર્કને દર્શાવે છે.
લુધિયાણાના ઉદ્યોગો માટે 'હલવારા એરપોર્ટ' વરદાન
પીએમ મોદી લુધિયાણાના હલવારા એરપોર્ટ પર નવા સિવિલ ટર્મિનલ બિલ્ડિંગનું પણ ઉદ્ઘાટન કરશે. લુધિયાણા અત્યાર સુધી નાના રનવેને કારણે મોટા વિમાનો સાથે જોડાયેલું નહોતું, પરંતુ હલવારા ખાતે નવું 'સિવિલ એન્ક્લેવ' બનતા હવે અહીં A320 જેવા મોટા એરક્રાફ્ટ લેન્ડ થઈ શકશે. આ એરપોર્ટ લુધિયાણાના ઔદ્યોગિક અને કૃષિ પટ્ટા માટે નિકાસના નવા દ્વાર ખોલશે.
વ્યૂહાત્મક મહત્વ અને આર્થિક ગતિ
હલવારા માત્ર સિવિલ એરપોર્ટ નથી, પરંતુ તે ભારતીય વાયુસેનાનું એક વ્યૂહાત્મક એરબેઝ પણ છે. ચેમ્બર ઓફ ઇન્ડસ્ટ્રિયલ એન્ડ કોમર્શિયલ અંડરટેકિંગ્સે આ પ્રોજેક્ટના ઉદ્ઘાટન પર ખુશી વ્યક્ત કરતા જણાવ્યું કે, આનાથી લુધિયાણાના મેન્યુફેક્ચરિંગ સેક્ટરને વૈશ્વિક કનેક્ટિવિટી મળશે અને રાજ્યના અર્થતંત્રને વેગ મળશે.