મુંબઈ: મહારાષ્ટ્રના રાજકારણમાં અત્યારે એક એવું નામ ચર્ચામાં છે જે દાયકાઓ સુધી પડદા પાછળ રહીને સામાજિક કાર્યોમાં વ્યસ્ત હતું. અમે વાત કરી રહ્યા છીએ સુનેત્રા પવારની. જેમને લોકો પ્રેમથી 'વાહિની' (ભાભી) અથવા 'તાઈ' કહીને સંબોધે છે. તેમના પતિ અને NCP ના દિગ્ગજ નેતા અજિત પવારના અવસાન બાદ, સુનેત્રા પવારે હવે રાજ્યના નાયબ મુખ્યમંત્રી તરીકેનો પદભાર સંભાળીને એક નવો અધ્યાય શરૂ કર્યો છે.
અનિચ્છાએ રાજકારણમાં પ્રવેશ પણ મક્કમ ડગલાં
૧૮ ઓક્ટોબર, ૧૯૬૩ના રોજ ધારાશિવમાં જન્મેલા સુનેત્રા પવાર રાજકીય વારસો ધરાવતા પરિવારમાંથી આવે છે, પરંતુ તેઓ પોતે વર્ષો સુધી સક્રિય રાજકારણથી દૂર રહ્યા હતા. ૨૦૨૪ની લોકસભા ચૂંટણીમાં જ્યારે તેમને બારામતીથી સુપ્રિયા સુલે સામે મેદાનમાં ઉતારવામાં આવ્યા ત્યારે તેઓ પહેલીવાર સીધા રાજકીય જંગમાં દેખાયા હતા. જોકે તે ચૂંટણીમાં તેમની હાર થઈ હતી, પરંતુ બાદમાં ભાજપના સહયોગથી તેઓ રાજ્યસભાના સભ્ય બન્યા અને હવે સરકારમાં મહત્વની ભૂમિકા નિભાવી રહ્યા છે.
પર્યાવરણ અને ગ્રામીણ વિકાસના પ્રણેતા
સુનેત્રા પવારની અસલી ઓળખ એક સમર્પિત પર્યાવરણવાદી તરીકેની છે. તેમણે ૨૦૧૦માં 'પર્યાવરણીય ફોરમ ઓફ ઇન્ડિયા' (EFOI) ની સ્થાપના કરી હતી. તેમના નેતૃત્વમાં ભારતના 'ઇકો-વિલેજ' મોડેલની શરૂઆત થઈ, જે અંતર્ગત ગામડાઓને આત્મનિર્ભર અને પર્યાવરણ પ્રત્યે જવાબદાર બનાવવાની પહેલ કરવામાં આવી. જૈવવિવિધતા અને જળ વ્યવસ્થાપન ક્ષેત્રે તેમના ઉત્કૃષ્ટ કાર્ય માટે તેમને પ્રતિષ્ઠિત 'ગ્રીન વોરિયર' એવોર્ડ પણ મળ્યો છે.
મહિલા સશક્તિકરણ અને શિક્ષણમાં યોગદાન
સામાજિક કાર્યોની સાથે સુનેત્રા પવારે આર્થિક સશક્તિકરણ પર પણ ભાર મૂક્યો છે. બારામતી હાઇ-ટેક ટેક્સટાઇલ પાર્કના અધ્યક્ષ તરીકે તેમણે ૧૫,૦૦૦ થી વધુ લોકોને રોજગારી પૂરી પાડી છે, જેમાં મોટાભાગની મહિલાઓ છે. આ ઉપરાંત, 'વિદ્યા પ્રતિષ્ઠાન' જેવી પ્રતિષ્ઠિત શૈક્ષણિક સંસ્થાના ટ્રસ્ટી તરીકે તેઓ ગ્રામીણ વિસ્તારના બાળકોને ગુણવત્તાયુક્ત શિક્ષણ મળે તે માટે પ્રયત્નશીલ રહ્યા છે.
સૌમ્ય સ્વભાવ અને મજબૂત વહીવટકર્તા
અજિત પવાર, જેમને લોકો 'દાદા' કહેતા હતા, તેમના વિશે સુનેત્રા પવાર કહેતા કે, "દાદા હૃદયથી બોલે છે, ઘણીવાર લોકો તેમને ગેરસમજ કરે છે પણ તેમનું હૃદય મોટું છે." હવે જ્યારે સુનેત્રા પવાર પોતે તેમના પતિના સ્થાને બેઠા છે, ત્યારે તેમની સામે અનેક રાજકીય પડકારો છે. તેમણે ન માત્ર પવાર પરિવારના વારસાને આગળ ધપાવવાનો છે પણ પક્ષમાં અને જનતામાં પોતાનો વિશ્વાસ પણ મજબૂત કરવાનો છે.