મુંબઈ: મહારાષ્ટ્રના રાજકારણમાં એક અત્યંત ભાવનાત્મક ક્ષણ જોવા મળી રહી છે. વિમાન દુર્ઘટનામાં પતિ અજિત પવારના અકાળ અવસાનના આઘાત વચ્ચે, સુનેત્રા પવારે આજે રાજ્યના પ્રથમ મહિલા નાયબ મુખ્યમંત્રી તરીકે શપથ લીધા છે. પદભાર સંભાળ્યા બાદ તેમની પ્રથમ પ્રતિક્રિયામાં તેમણે હૃદયની વ્યથા અને મહારાષ્ટ્રની જનતા પ્રત્યેની જવાબદારીનો સુમેળ સાધ્યો હતો.
"હૃદય છલકાઈ રહ્યું છે, પણ ફરજ સર્વોપરી છે"
રાજ્યપાલ આચાર્ય દેવવ્રતે લોકભવન ખાતે તેમને પદ અને ગોપનીયતાના શપથ લેવડાવ્યા હતા. શપથ લીધા બાદ સુનેત્રા પવારે સોશિયલ મીડિયા પર મરાઠીમાં એક હૃદયસ્પર્શી પોસ્ટ મૂકી હતી. તેમણે લખ્યું, "આદરણીય અજિતદાદાએ ખેડૂતો, મહિલાઓ અને યુવાનો માટે પોતાનું જીવન સમર્પિત કરવાનો મંત્ર આપ્યો હતો. આજે 'શિવ-શાહુ-ફૂલે-આંબેડકર'ના સિદ્ધાંતો સાથે તેમના વિચારોના વારસાને આગળ ધપાવતા મારું હૃદય ભરાઈ આવ્યું છે."
અજિત પવારનું વિમાન દુર્ઘટનામાં નિધન
ઉલ્લેખનીય છે કે, ગત ૨૮ જાન્યુઆરીના રોજ બારામતી પાસે થયેલી એક દુર્ભાગ્યપૂર્ણ લિયરજેટ ૪૫ વિમાન દુર્ઘટનામાં અજિત પવાર સહિત પાંચ લોકોના મોત થયા હતા. આ અકસ્માતે સમગ્ર મહારાષ્ટ્રને હચમચાવી દીધું હતું. આ મુશ્કેલ સમયમાં રાષ્ટ્રવાદી કોંગ્રેસ પાર્ટી (NCP) એ સુનેત્રા પવાર પર વિશ્વાસ મૂકીને તેમને પક્ષના નેતા અને હવે નાયબ મુખ્યમંત્રી તરીકે પસંદ કર્યા છે.
લોકોનો પ્રેમ જ મારી સાચી શક્તિ
૬૨ વર્ષીય સુનેત્રા પવારે જણાવ્યું કે, તેમના હૃદય પર અત્યારે દુઃખનો પહાડ છે, પરંતુ અજિતદાદાએ શીખવેલી સંઘર્ષ કરવાની શક્તિ તેમને આગળ વધવા પ્રેરી રહી છે. તેમણે ઉમેર્યું, "મહારાષ્ટ્રના લોકોનો પ્રેમ અને ટેકો જ મારી સાચી શક્તિ છે. હું દાદાના સપનાના ન્યાયી અને વિકસિત મહારાષ્ટ્રને સાકાર કરવા માટે પ્રામાણિકપણે કામ કરીશ."