નવી દિલ્હી: આવતીકાલથી ફેબ્રુઆરી મહિનાની શરૂઆત થઈ રહી છે અને તેની સાથે જ દેશમાં આર્થિક પરિવર્તનોનો પવન ફૂંકાશે. રવિવારે રજૂ થનારા કેન્દ્રીય બજેટની સાથે જ પાંચ એવા ફેરફારો અમલમાં આવશે જેની સીધી અસર સામાન્ય માણસના બજેટ અને રોજિંદા કામકાજ પર પડશે. ચાલો જાણીએ, કયા ક્ષેત્રોમાં તમને રાહત મળશે અને ક્યાં ખર્ચ વધશે.
૧. તમાકુના શોખીનો માટે ખરાબ સમાચાર
કેન્દ્ર સરકારે એક્સાઇઝ ડ્યુટીમાં વધારો કરતા આવતીકાલથી સિગારેટ, ગુટખા, પાન મસાલા અને અન્ય તમાકુ ઉત્પાદનો મોંઘા થશે. ખાસ કરીને ફિલ્ટર કરેલી સિગારેટ પર ડ્યુટી વધારવામાં આવી છે. આ ઉપરાંત, આરોગ્ય અને રાષ્ટ્રીય સુરક્ષા સેસ લાગુ થવાને કારણે છૂટક ભાવમાં મોટો ઉછાળો જોવા મળી શકે છે. જોકે, બીડી પરના ટેક્સમાં કોઈ ફેરફાર કરાયો નથી.
૨. FASTag માં 'KYV' ઝંઝટમાંથી મુક્તિ
વાહનચાલકો માટે રાહતના સમાચાર છે! NHAI એ કાર, જીપ અને વાન માટે નવા FASTag લેવા માટેની Know Your Vehicle (KYV) પ્રક્રિયા નાબૂદ કરી દીધી છે. હવે KYC ની ચકાસણીની જવાબદારી બેંકોની રહેશે, જેનાથી નવા વપરાશકર્તાઓ માટે પ્રોસેસ ઝડપી બનશે. જૂના વાહનચાલકોએ પણ હવે વારંવાર વેરિફિકેશનની જરૂર નહીં પડે.
૩. રસોડાનું બજેટ ખોરવાઈ શકે? (LPG, CNG & PNG)
દર મહિનાની પહેલી તારીખની જેમ, ૧ ફેબ્રુઆરીએ પણ ગેસ સિલિન્ડરના ભાવમાં સુધારો થઈ શકે છે. આંતરરાષ્ટ્રીય બજારની સ્થિતિ જોતા રસોઈ ગેસ (LPG) ના ભાવમાં વધઘટની શક્યતા છે. આ સાથે જ ગાડીઓમાં વપરાતા CNG અને ઘરોમાં વપરાતા પાઈપ્ડ નેચરલ ગેસ (PNG) ના ભાવમાં પણ ફેરફાર થઈ શકે છે, જે સામાન્ય જનતાના ઘરખર્ચ પર અસર કરશે.
૪. હવાઈ મુસાફરી અને શેરબજાર
ઉડ્ડયન બળતણ (ATF) ના ભાવમાં વધારો થવાની સંભાવનાને પગલે આગામી દિવસોમાં હવાઈ ટિકિટના દરો વધી શકે છે. બીજી તરફ, રવિવાર હોવા છતાં બજેટના કારણે NSE અને BSE એટલે કે શેરબજાર ખુલ્લા રહેશે, જે રોકાણકારો માટે મોટી વાત છે.
૫. આર્થિક આયોજનમાં સાવધાની
નિષ્ણાતો માને છે કે આ ફેરફારો સામાન્ય નાગરિકોના નાણાકીય આયોજન પર સીધી અસર કરશે. ખાસ કરીને મોંઘા થતા વ્યસનો અને ઈંધણના ખર્ચને ધ્યાનમાં રાખીને લોકોએ પોતાનું માસિક બજેટ નવેસરથી તૈયાર કરવું પડશે.