નવી દિલ્હી: દેશની રાજધાની દિલ્હીમાં જાન્યુઆરીના અંતિમ દિવસે શિયાળાએ આકરો મિજાજ બતાવ્યો છે. શનિવારે દિલ્હીનું લઘુત્તમ તાપમાન ગગડીને 6.7°C નોંધાયું હતું, જે સામાન્ય કરતા ૧ ડિગ્રી ઓછું છે. જોકે, દિલ્હીવાસીઓ માટે મુશ્કેલી માત્ર ઠંડી પૂરતી મર્યાદિત નથી, કારણ કે ભારતીય હવામાન વિભાગ (IMD) એ હવે વરસાદ અને વાવાઝોડાની ચેતવણી સાથે 'યલો એલર્ટ' જાહેર કર્યું છે.
વરસાદ અને ધુમ્મસનો ડબલ એટેક
હવામાન વિભાગના જણાવ્યા અનુસાર, પશ્ચિમી વિક્ષેપ (Western Disturbance) ને કારણે સોમવાર સુધી દિલ્હીમાં હળવાથી મધ્યમ વરસાદની શક્યતા છે. શનિવારે દિવસ દરમિયાન ૩૦ થી ૪૦ કિમી પ્રતિ કલાકની ઝડપે પવન ફૂંકાવા સાથે ગાજવીજ થવાની પણ સંભાવના છે. રવિવારે વાદળછાયા વાતાવરણને કારણે લઘુત્તમ તાપમાનમાં થોડો ઉછાળો આવી શકે છે અને પારો ૧૧ થી ૧૩ ડિગ્રીની આસપાસ રહી શકે છે, પરંતુ ગાઢ ધુમ્મસ મુસાફરોની મુશ્કેલીમાં વધારો કરશે.
ઝેરીલી હવાએ ચિંતા વધારી
ઠંડી અને વરસાદની વચ્ચે દિલ્હીની હવાની ગુણવત્તા (AQI) પણ ચિંતાજનક સ્તરે પહોંચી છે. શનિવારે સવારે ૯ વાગ્યે AQI ૨૭૮ નોંધાયો હતો, જે શુક્રવાર કરતા વધુ ખરાબ છે. સેન્ટ્રલ પોલ્યુશન કંટ્રોલ બોર્ડ (CPCB) ના જણાવ્યા અનુસાર, આગામી ત્રણ દિવસ સુધી હવાની ગુણવત્તા 'ખૂબ જ ખરાબ' શ્રેણીમાં રહેવાની શક્યતા છે.
આગામી ૬ દિવસની સ્થિતિ
હવામાનની આગાહી કરતી સિસ્ટમ (AQEWS) મુજબ, દિલ્હીમાં આગામી એક સપ્તાહ સુધી વાતાવરણમાં મોટા પલટા આવતા રહેશે. વરસાદને કારણે પ્રદૂષણમાં થોડો ઘટાડો થઈ શકે છે, પરંતુ ભેજ અને ગાઢ ધુમ્મસને કારણે વિઝિબિલિટી ઓછી રહેશે, જેનાથી વાહન વ્યવહાર અને ફ્લાઇટ્સ પર અસર પડી શકે છે.