નવી દિલ્હી : આજે ૧ ફેબ્રુઆરીએ સવારે ૧૧ વાગ્યે નાણામંત્રી નિર્મલા સીતારમણે નવમી વખત બજેટ રજૂ કરીને નવો કીર્તિમાન સ્થાપિત કર્યો છે. મધ્યમ વર્ગ માટે સૌથી મોટા સમાચાર એ છે કે ૧ એપ્રિલ, ૨૦૨૬ થી 'આવકવેરા કાયદો ૨૦૨૫' અમલમાં આવશે, જેમાં ટેક્સ ફોર્મ્સને અત્યંત સરળ બનાવવામાં આવ્યા છે. સરકારે દાવો કર્યો છે કે હવે સામાન્ય નાગરિકો કોઈપણ મુશ્કેલી વગર પોતે જ ટેક્સ રિટર્ન ફાઇલ કરી શકશે. પેપરલેસ ફોર્મેટમાં રજૂ થયેલા આ બજેટે ડિજિટલ ઇન્ડિયાના વિઝનને વધુ મજબૂત બનાવ્યું છે.

મહિલા સશક્તિકરણ માટે સરકારે ‘SHE માર્ટ્સ’ (Self Help Group Marts) ની ધમાકેદાર જાહેરાત કરી છે. ‘લખપતિ દીદી’ ની સફળતા બાદ હવે ગ્રામીણ મહિલાઓ આ માર્ટ્સનું સંચાલન પોતે ‘કેપ્ટન’ તરીકે કરશે. આ ક્રેડિટ-લિંક્ડ યોજના દ્વારા મહિલાઓને આજીવિકાના નવા સાધનો મળશે. સાથે જ, ઉત્તર ભારતમાં માનસિક સ્વાસ્થ્ય સેવાઓની અછત દૂર કરવા રાંચી અને તેજપુરમાં NIMHANS-2 સ્થાપવાની જાહેરાત કરાઈ છે, જે સ્વાસ્થ્ય ક્ષેત્રે એક ક્રાંતિકારી પગલું માનવામાં આવે છે.

પ્રવાસન અને કૌશલ્ય વિકાસ પર ધ્યાન કેન્દ્રિત કરતા નાણામંત્રીએ ૧૦,૦૦૦ ગાઈડ્સને ટ્રેનિંગ આપવા માટેની પાયલોટ યોજના રજૂ કરી છે. દેશના ૨૦ મુખ્ય પ્રવાસન સ્થળો પર હાઇબ્રિડ મોડમાં ૧૨ અઠવાડિયાની તાલીમ આપવામાં આવશે, જેના માટે ટોચની મેનેજમેન્ટ સંસ્થાઓ સાથે ભાગીદારી કરવામાં આવી છે. આ ઉપરાંત, પૂર્વ ભારતમાં નેશનલ ઇન્સ્ટિટ્યૂટ ઓફ ડિઝાઇન (NID) અને ખગોળશાસ્ત્રને પ્રોત્સાહન આપવા માટે ચાર અત્યાધુનિક ટેલિસ્કોપ ઇન્ફ્રાસ્ટ્રક્ચર સુવિધાઓ સ્થાપિત કરવામાં આવશે.

આર્થિક સર્વેક્ષણ મુજબ, ભારતનો વૃદ્ધિ દર ૭% રહેવાનો અંદાજ છે, જે વિશ્વ બેંક અને IMF ના અંદાજ કરતા પણ વધુ છે. આરોગ્ય ક્ષેત્રે ત્રણ નવા ‘ઓલ ઇન્ડિયા ઇન્સ્ટિટ્યૂટ ઓફ આયુર્વેદ’ અને હાઈ-ક્વોલિટી ટેસ્ટિંગ લેબ્સની જાહેરાતથી મેડિકલ ટુરિઝમને વેગ મળશે. નાણામંત્રીએ સ્પષ્ટ કર્યું કે આ બજેટ દરેક વર્ગના ઉત્થાન માટે છે. ૨ એપ્રિલે બજેટ સત્ર પૂર્ણ થશે ત્યાં સુધીમાં આ તમામ યોજનાઓના રોડમેપ પર વિસ્તૃત ચર્ચા કરવામાં આવશે.