કોલકાતા/નવી દિલ્હી:નિર્મલા સીતારમણે રજૂ કરેલા વર્ષ ૨૦૨૬-૨૭ના સામાન્ય બજેટને ભાજપે ભલે 'વિકસિત ભારત'નું સોપાન ગણાવ્યું હોય, પરંતુ વિપક્ષી છાવણીમાં આક્રોશનો જ્વાળામુખી ફાટી નીકળ્યો છે. પશ્ચિમ બંગાળના મુખ્યમંત્રી મમતા બેનર્જીએ કેન્દ્ર સરકાર પર બંગાળ સાથે ઓરમાયું વર્તન કરવાનો સીધો આરોપ લગાવતા બજેટને 'દિશાહીન' અને 'રાજકીય ભેદભાવ'થી ભરેલું ગણાવ્યું છે. મમતાએ સરકારના મહત્વકાંક્ષી 'આર્થિક કોરિડોર' પ્રોજેક્ટને પણ 'કચરો' ગણાવીને ફગાવી દીધો છે, જે દર્શાવે છે કે આગામી દિવસોમાં કેન્દ્ર અને બંગાળ વચ્ચેનો સંઘર્ષ વધુ ઉગ્ર બનશે.

બજેટ રજૂ થયાની ગણતરીની મિનિટોમાં જ કોંગ્રેસે સોશિયલ મીડિયા પર મોરચો ખોલી દીધો હતો. કોંગ્રેસના નેતા જયરામ રમેશ અને પ્રમોદ તિવારીએ દાવો કર્યો છે કે બજેટની અસ્પષ્ટતાને કારણે જ શેરબજારમાં કડાકો બોલાયો છે અને રોકાણકારોના કરોડો રૂપિયા ધોવાઈ ગયા છે. સાંસદ સુખદેવ ભગતે કટાક્ષમાં કહ્યું કે, "સરકારે પહાડ ખોદ્યો પણ અંદરથી તો માત્ર ઉંદર જ બહાર આવ્યો છે." વિપક્ષનો આરોપ છે કે જ્યાં સુધી અર્થતંત્ર સંપૂર્ણપણે ખાડામાં નહીં ડૂબી જાય ત્યાં સુધી સરકાર પોતાની નિષ્ફળતા સ્વીકારવા તૈયાર નથી.

કેવળ કોંગ્રેસ જ નહીં, પરંતુ શિરોમણી અકાલી દળના હરસિમરત કૌર બાદલે પણ આ બજેટને 'ઉદ્યોગપતિઓનું બજેટ' ગણાવી ખેડૂતોની અવગણના કરવાનો આક્ષેપ કર્યો છે. સમાજવાદી પાર્ટીના સાંસદ ડિમ્પલ યાદવે પણ સુર પુરાવતા કહ્યું કે, "આ બજેટમાં મહિલાઓ અને સામાન્ય માણસ માટે કંઈ જ નથી, કારણ કે અત્યારે કોઈ ચૂંટણીઓ નથી." વિપક્ષના આ તીવ્ર પ્રત્યાઘાતો સાબિત કરે છે કે બજેટ ૨૦૨૬ હવે સંસદથી લઈને રસ્તાઓ સુધીના રાજકીય યુદ્ધનું કેન્દ્ર બનવા જઈ રહ્યું છે.