નવી દિલ્હી :  નાણામંત્રી નિર્મલા સીતારમણે રવિવારે સંસદમાં નાણાકીય વર્ષ 2026-27 માટેનું કેન્દ્રીય બજેટ રજૂ કર્યું. બજેટ 2026માં માછીમારી અને માછલી ઉછેર સાથે જોડાયેલા ખેડૂતો માટે અનેક મોટી અને લાભદાયી જાહેરાતો કરવામાં આવી છે. સરકારનો મુખ્ય ઉદ્દેશ માછલી ઉત્પાદન વધારવાનો, રોજગાર સર્જવાનો અને દરિયાઈ અર્થવ્યવસ્થાને મજબૂત બનાવવાનો છે. 

  આંતરરાષ્ટ્રીય સીફૂડ બજારમાં ભારતની સ્થિતિ વધુ મજબૂત બનાવવા માટે સરકાર દ્વારા મોટા રાહત પગલાં લેવામાં આવ્યા છે. ફ્રોઝન ફિશ પેસ્ટ (સુરીમી) પરની મૂળભૂત કસ્ટમ ડ્યુટી 30 ટકા પરથી ઘટાડીને 5 ટકા કરવામાં આવી છે. સાથે સાથે, માછલી અને ઝીંગાના ફીડમાં વપરાતા ફિશ હાઇડ્રોલાયસેટ પરની ડ્યુટી પણ 15 ટકાથી ઘટાડીને 5 ટકા કરવામાં આવી છે

માછલી ઉત્પાદન અને જળચરઉછેર ક્ષેત્રમાં ભારત વિશ્વમાં બીજા ક્રમે છે. હાલમાં ભારતમાંથી સીફૂડની નિકાસ અંદાજે ₹60,000 કરોડ સુધી પહોંચી છે. દરિયાઈ ક્ષેત્રની સંપૂર્ણ ક્ષમતા ઉપયોગમાં લેવા માટે સરકાર ભારતીય વિશિષ્ટ આર્થિક ક્ષેત્ર (EEZ) અને ખુલ્લા સમુદ્રોમાં માછીમારી સંસાધનોના કાર્યક્ષમ અને ટકાઉ ઉપયોગ માટે નવી પદ્ધતિઓ અમલમાં મૂકશે. ખાસ કરીને આંદામાન-નિકોબાર અને લક્ષદ્વીપ ટાપુઓ પર વિશેષ ધ્યાન કેન્દ્રિત કરવામાં આવશે.