મુંબઈ: બોલીવુડના જાણીતા ફિલ્મ નિર્માતા અને દિગ્દર્શક રોહિત શેટ્ટીના મુંબઈના જુહુ વિસ્તારમાં આવેલા નિવાસસ્થાન પર ગોળીબારની ઘટનાએ સમગ્ર ફિલ્મ જગતમાં સનસનાટી મચાવી દીધી છે. આ હુમલાની જવાબદારી પાછળ કુખ્યાત લોરેન્સ બિશ્નોઈ ગેંગનું નામ ચર્ચાઈ રહ્યું છે. પોલીસે આ મામલે ત્વરિત અને મોટી કાર્યવાહી કરતા રવિવારે મહારાષ્ટ્રના પુણે શહેરમાંથી પાંચ શંકાસ્પદ શખ્સોની અટકાયત કરી છે.
    બોલીવુડ સુપરસ્ટાર સલમાન ખાન બાદ હવે જાણીતા એક્શન ડાયરેક્ટર રોહિત શેટ્ટી પણ ગેંગસ્ટરોના નિશાના પર હોય તેમ લાગી રહ્યું છે. પ્રાપ્ત અહેવાલો અનુસાર, રોહિત શેટ્ટીના મુંબઈના જુહુ સ્થિત આલીશાન બંગલા પર અજાણ્યા શખ્સો દ્વારા ફાયરિંગ કરવામાં આવ્યું હતું. આ ઘટના બાદ મુંબઈ પોલીસ દોડતી થઈ ગઈ હતી અને સુરક્ષા વ્યવસ્થામાં તાત્કાલિક વધારો કરી દેવામાં આવ્યો હતો.
  ઘટનાની ગંભીરતાને ધ્યાનમાં લઈ પોલીસે વિવિધ ટીમો બનાવી તપાસ હાથ ધરી હતી. આ તપાસમાં પોલીસને મોટી સફળતા મળી છે. અહેવાલો મુજબ, પુણે પોલીસે રવિવારે એક ખાસ ઓપરેશન પાર પાડીને આ ફાયરિંગ પ્રકરણમાં સંડોવાયેલા હોવાની શંકાના આધારે કુલ પાંચ શખ્સોની અટકાયત કરી છે. પકડાયેલા આરોપીઓની હાલ સઘન પૂછપરછ ચાલી રહી છે.
સૂત્રોના જણાવ્યા અનુસાર, આ હુમલા પાછળ કુખ્યાત ગેંગસ્ટર લોરેન્સ બિશ્નોઈની ગેંગનો હાથ હોવાનો દાવો કરવામાં આવી રહ્યો છે.
 સોશિયલ મીડિયા અને અન્ય માધ્યમો પર વહેતા થયેલા અહેવાલો મુજબ, ગેંગ દ્વારા ભયનો માહોલ ઊભો કરવા માટે આ કૃત્ય કરવામાં આવ્યું હોવાની શક્યતા છે. જોકે, પોલીસ દ્વારા હજુ સુધી સત્તાવાર રીતે ગેંગના નામની પુષ્ટિ કે ફાયરિંગ પાછળના મુખ્ય કારણ અંગે કોઈ ચોક્કસ નિવેદન બહાર પાડવામાં આવ્યું નથી, પરંતુ પ્રાથમિક તપાસનો રેલો બિશ્નોઈ ગેંગ તરફ જઈ રહ્યો છે.
ઉલ્લેખનીય છે કે, રોહિત શેટ્ટી પોતાની એક્શન ફિલ્મો અને પોલીસ કેન્દ્રિત ફિલ્મો (જેમ કે સિંઘમ, સિમ્બા, સૂર્યવંશી) માટે જાણીતા છે. તેઓ અવારનવાર મુંબઈ પોલીસ સાથે કામ કરતા જોવા મળે છે. આ ઘટના બાદ બોલીવુડના અન્ય કલાકારોની સુરક્ષા અંગે પણ પ્રશ્નો ઉભા થયા છે. 
હાલમાં મુંબઈ ક્રાઈમ બ્રાન્ચ અને પુણે પોલીસ સંયુક્ત રીતે આ કેસની તપાસ કરી રહી છે અને પકડાયેલા પાંચેય આરોપીઓના રિમાન્ડ મેળવવાની તજવીજ હાથ ધરાઈ છે.
આ ઘટનાએ ફરી એકવાર સાબિત કર્યું છે કે અંડરવર્લ્ડ અને ગેંગસ્ટરોનો ડોળો હવે બોલીવુડ પર મંડાયેલો છે. પોલીસ ટૂંક સમયમાં આ અંગે પત્રકાર પરિષદ યોજીને વધુ વિગતો જાહેર કરે તેવી શક્યતા છે.