મુંબઈ: મહારાષ્ટ્રના નાયબ મુખ્યમંત્રી અને NCP ના દિગ્ગજ નેતા અજિત પવારના અચાનક થયેલા નિધને સમગ્ર દેશને સ્તબ્ધ કરી દીધો છે. ગત બુધવારે બારામતી નજીક થયેલી વિમાન દુર્ઘટનામાં તેમનું કરુણ મોત નીપજ્યું હતું. જોકે, હવે આ મામલે શિવસેના (UBT) ના સાંસદ સંજય રાઉતે ગંભીર સવાલો ઉઠાવીને રાજકીય માહોલ ગરમાવી દીધો છે. રાઉતે દાવો કર્યો છે કે અજિત પવારના મોત પાછળ "પડદા પાછળનો ખેલ" હોઈ શકે છે અને આ ઘટનાની ઉચ્ચ સ્તરીય તપાસ થવી જોઈએ.

સંજય રાઉતે મીડિયા સાથે વાત કરતા જણાવ્યું કે, અજિત દાદા છેલ્લા કેટલાક સમયથી તેમના કાકા શરદ પવાર સાથે સમાધાન કરવા અને ફરી "ઘરે પાછા ફરવા" (પાર્ટી એક કરવા) માટે આતુર હતા. રાઉતનો આરોપ છે કે કેટલાક શક્તિશાળી લોકો આ મિલનના વિરોધમાં હતા, કારણ કે જો NCP ના બંને જૂથો એક થઈ ગયા હોત તો તેમની "રાજકીય દુકાનો" બંધ થઈ ગઈ હોત.

રાઉતના ત્રણ મુખ્ય તર્ક:

• જસ્ટિસ લોયા સાથે સરખામણી: સંજય રાઉતે આ ઘટનાની તુલના જસ્ટિસ લોયાના રહસ્યમય મોત સાથે કરી છે અને સવાલ પૂછ્યો છે કે, "શું અહીં પણ કોઈએ કંઈક કર્યું છે?"
• ફાઇલોની ધમકી: રાઉતે દાવો કર્યો છે કે મોત પહેલા અજિત પવારને સિંચાઈ કૌભાંડની ફાઈલો બતાવીને ભાજપ દ્વારા દબાણ કરવામાં આવ્યું હતું, જેનો અજિત દાદાએ જડબાતોડ જવાબ પણ આપ્યો હતો.
• સીટની લડાઈ: અજિત પવારના અવસાન બાદ તુરંત જ તેમની પત્ની સુનેત્રા પવારને નાયબ મુખ્યમંત્રી બનાવવામાં આવ્યા છે, જેના પર પણ રાઉતે શંકાની સોય તાકી છે.

બીજી તરફ, શરદ પવારે આ મામલે શાંતિ જાળવવાની અપીલ કરી છે અને વિનંતી કરી છે કે ભત્રીજાના મૃત્યુ પર રાજકારણ ન ખેલાવું જોઈએ. મુખ્યમંત્રી દેવેન્દ્ર ફડણવીસે પણ NCP ના વિલીનીકરણની વાતોને નકારી કાઢી છે. દરમિયાન, મુંબઈમાં NCP કાર્યાલય ખાતે પિતાની ખાલી ખુરશી જોઈને પુત્ર પાર્થ પવાર ધ્રુસકે ને ધ્રુસકે રડી પડ્યા હતા, જે દ્રશ્યોએ સૌની આંખો ભીની કરી દીધી હતી.