નવી દિલ્હી: વર્ષ 2024 ના ચર્ચિત 'પુણે પોર્શે અકસ્માત' કેસમાં આજે સુપ્રીમ કોર્ટ તરફથી મહત્વનો ચુકાદો આવ્યો છે. અકસ્માત બાદ સગીર આરોપીઓને બચાવવા માટે લોહીના નમૂના (Blood Samples) બદલવાના આરોપમાં જેલમાં બંધ ત્રણ આરોપીઓને અદાલતે જામીન મંજૂર કર્યા છે. જસ્ટિસ બી.વી. નાગરત્ના અને જસ્ટિસ ઉજ્જલ ભુયાનની બેન્ચે અવલોકન કર્યું કે, "કોઈપણ વ્યક્તિને દોષિત ઠેરવતા પહેલા જેલમાં રાખવી એ સજા ન હોઈ શકે."

જામીન મેળવનારાઓમાં આદિત્ય અવિનાશ સૂદ, આશિષ મિત્તલ અને અમર ગાયકવાડનો સમાવેશ થાય છે. આદિત્ય સૂદ પર આરોપ છે કે તેમણે કારમાં હાજર પોતાના સગીર પુત્રના લોહીના નમૂના બદલાવ્યા હતા, જ્યારે અન્ય બે આરોપીઓ પર સસૂન હોસ્પિટલમાં લાંચ આપીને આ આખી ગોઠવણ કરવા માટે મધ્યસ્થી તરીકે કામ કરવાનો આરોપ છે.

કોર્ટે માતા-પિતા અને સિસ્ટમ પર શું કહ્યું?

• મુખ્ય ગુનેગાર પર ધ્યાન આપો: સુપ્રીમ કોર્ટે રાજ્ય સરકારને ટકોર કરી કે જે સગીરે નશાની હાલતમાં ગાડી ચલાવીને બે નિર્દોષ લોકોના જીવ લીધા છે, તેના પર વધુ ધ્યાન કેન્દ્રિત કરવામાં આવે.
• માતા-પિતાનો અંકુશ: બેન્ચે ગંભીર નોંધ લેતા કહ્યું કે, બાળકોને દારૂ પીવાની છૂટ આપવી અને ઉજવણીના નામે ગાડી આપવી એ દર્શાવે છે કે માતા-પિતાનો સંતાનો પર કોઈ અંકુશ નથી. આ ઉજવણીના કારણે બે નિર્દોષ લોકોએ જીવ ગુમાવ્યા છે.
• 18 મહિનાનો જેલવાસ: અદાલતે જામીન આપતી વખતે એ પણ ધ્યાનમાં લીધું કે આરોપીઓ છેલ્લા 18 મહિનાથી જેલમાં છે.

પીડિત પરિવારો અને રાજ્ય સરકારે આ જામીનનો સખત વિરોધ કર્યો હતો. તેમની દલીલ હતી કે આ લોકો એટલા વગદાર છે કે તેઓ પુરાવા સાથે છેડછાડ કરી શકે છે અને સાક્ષીઓને ડરાવી શકે છે. જોકે, સુપ્રીમ કોર્ટે શરતી જામીન આપતા સ્પષ્ટ ચેતવણી આપી છે કે જો કોઈ સાક્ષીનો સંપર્ક કરવાનો પ્રયાસ થશે, તો જામીન તુરંત રદ કરવામાં આવશે.