બારામતી, તા. 02: મહારાષ્ટ્રના દિગ્ગજ નેતા અજિત પવારના નિધનથી આખું રાજ્ય શોકમાં ડૂબેલું હતું, ત્યારે તેમની અંતિમ વિદાયમાં એક આઘાતજનક કિસ્સો પ્રકાશમાં આવ્યો છે. બારામતીના વિદ્યા પ્રતિષ્ઠાન મેદાનમાં જ્યારે લાખોની મેદની અશ્રુભીની આંખે 'અજિત દાદા'ને અંતિમ શ્રદ્ધાંજલિ આપી રહી હતી, ત્યારે તસ્કરોની એક ટોળકીએ તકનો લાભ ઉઠાવીને આશરે ₹25 થી ₹30 લાખની કિંમતના સોનાના દાગીનાની ચોરી કરી છે.

અહેવાલો અનુસાર, અંતિમ સંસ્કાર દરમિયાન ઉમટેલી ભારે ભીડ અને ભાવનાત્મક વાતાવરણનો ફાયદો ઉઠાવી ચોરોએ અંદાજે 15 જેટલા શ્રદ્ધાળુઓ અને શોકગ્રસ્તોના ગળામાંથી સોનાની ચેઈન ખેંચી લીધી હતી. આ ગૌરવપૂર્ણ અને ગંભીર પ્રસંગે બનેલી ચોરીની ઘટનાએ સ્થાનિક પોલીસ અને સુરક્ષા વ્યવસ્થા સામે પણ પ્રશ્નો ઉભા કર્યા છે. જોકે, કેટલાક જાગૃત નાગરિકોએ શંકાસ્પદ તસ્કરોને પકડીને પોલીસને હવાલે કર્યા હોવાનું પણ જાણવા મળ્યું છે.

તપાસના ચક્રો ગતિમાન: બ્લેક બોક્સ ખુલશે

બીજી તરફ, અજિત પવારના વિમાન અકસ્માતની તપાસ પણ તેજ બની છે. નાગરિક ઉડ્ડયન રાજ્યમંત્રી મુરલીધર મોહોલે જણાવ્યું છે કે વિમાનનું 'બ્લેક બોક્સ' મળી આવ્યું છે. એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) આગામી 45 દિવસમાં આ અકસ્માતનો પ્રારંભિક રિપોર્ટ રજૂ કરશે. પ્રાથમિક અંદાજ મુજબ, ખરાબ હવામાન અને ઓછી દૃશ્યતા (Low Visibility) આ દુર્ઘટના પાછળનું કારણ હોઈ શકે છે.

બારામતીમાં બનશે ભવ્ય સ્મારક

અજિત પવારની સ્મૃતિને ચિરંજીવી રાખવા માટે પવાર પરિવારની શૈક્ષણિક સંસ્થા 'વિદ્યા પ્રતિષ્ઠાન'ના પરિસરમાં તેમનું એક ભવ્ય સ્મારક બનાવવાનું પણ આયોજન કરવામાં આવ્યું છે. આ એ જ મેદાન છે જ્યાં હજારો લોકોની હાજરીમાં તેમના અંતિમ સંસ્કાર કરવામાં આવ્યા હતા.

અજિત પવાર એક જાહેર રેલીને સંબોધવા જઈ રહ્યા હતા ત્યારે થયેલા આ અકસ્માતે મહારાષ્ટ્રના રાજકારણમાં ક્યારેય ન પુરાય તેવી ખોટ પાડી છે, પરંતુ અંતિમ સંસ્કારમાં થયેલી આ ચોરીએ લોકોમાં ભારે રોષ જન્માવ્યો છે.