મુંબઈ: શેરબજારમાં રોકાણકારો માટે આજનો દિવસ (૩ ફેબ્રુઆરી) ખૂબ જ મહત્વનો છે. અદાણી જૂથની મુખ્ય કંપનીઓ અને બજાજ ફાઇનાન્સ સહિતના મોટા કોર્પોરેટ ગૃહો આજે તેમના નાણાકીય વર્ષના ત્રીજા ક્વાર્ટરના પરિણામો જાહેર કરશે. આ પરિણામોની સીધી અસર આજે શેરબજારની ચાલ પર જોવા મળી શકે છે.

ભારતીય શેરબજારમાં આજે ૩ ફેબ્રુઆરીના રોજ મોટી હલચલ જોવા મળી શકે છે કારણ કે દેશની ઘણી નામચીન કંપનીઓ તેમના ઓક્ટોબરથી ડિસેમ્બર ક્વાર્ટરના પરિણામો રજૂ કરવા જઈ રહી છે. પ્રાપ્ત વિગતો મુજબ, આજે જે કંપનીઓ પર બજારની નજર રહેશે તેમાં મુખ્યત્વે 'બજાજ ફાઇનાન્સ', 'અદાણી પોર્ટ્સ', 'અદાણી એન્ટરપ્રાઇઝીસ', 'પીડીલાઇટ', 'વરુણ બેવરેજીસ' અને 'મેનકાઇન્ડ ફાર્મા'નો સમાવેશ થાય છે. રોકાણકારો ખાસ કરીને અદાણી જૂથ અને બજાજ ફાઇનાન્સના નફાના આંકડા અને ભવિષ્યના ગાઈડન્સ પર નજર રાખી રહ્યા છે.

આ ઉપરાંત, માર્કેટ રેગ્યુલેટર 'સેબી' દ્વારા રોકાણકારો, ખાસ કરીને ફ્યુચર્સ અને ઓપ્શન્સ માં ટ્રેડિંગ કરતા લોકો માટે જોખમની ચેતવણી પણ જારી કરવામાં આવી છે. 

સેબીના ડેટા મુજબ, ઇક્વિટી ફ્યુચર્સ અને ઓપ્શન્સ સેગમેન્ટમાં ૧૦ માંથી ૯ વ્યક્તિગત ટ્રેડર્સ નુકસાન કરે છે. સરેરાશ રીતે એક ટ્રેડર ૫૦,૦૦૦ રૂપિયા સુધીનું ચોખ્ખું નુકસાન ભોગવે છે. આ ઉપરાંત ટ્રાન્ઝેક્શન કોસ્ટ તરીકે તેઓ નુકસાનના ૨૮ ટકા જેટલી રકમ અલગથી ચૂકવે છે. તેથી, બ્રોકરેજ ફર્મ્સ (જેમ કે અપસ્ટોક્સ) દ્વારા રોકાણકારોને સાવચેતીપૂર્વક અને જોખમ સમજીને જ રોકાણ કરવાની સલાહ આપવામાં આવી છે.