પેરિસ : સોશિયલ મીડિયા પ્લેટફોર્મ 'X' (અગાઉનું ટ્વિટર) અને તેના માલિક એલોન મસ્ક ફરી એકવાર કાયદાકીય કુંડાળામાં ફસાયા છે. ફ્રાન્સની રાજધાની પેરિસમાં કાર્યરત 'X'ની ઓફિસો પર મંગળવારે સાયબર ક્રાઇમ યુનિટના અધિકારીઓએ આકસ્મિક દરોડા પાડ્યા હતા. આ તપાસ આર્ટિફિશિયલ ઇન્ટેલિજન્સ (AI) દ્વારા બનાવાયેલા વાંધાજનક સેક્સ્યુઅલ ડીપફેક વીડિયો અને બાળ જાતીય શોષણ સંબંધિત સામગ્રીના પ્રસારના ગંભીર આરોપો હેઠળ કરવામાં આવી રહી છે.

શું છે તપાસનો ઘેરો?

પેરિસ પ્રોસિક્યુટર ઓફિસના જણાવ્યા અનુસાર, આ તપાસ જાન્યુઆરી 2025થી ચાલી રહી છે. આરોપ છે કે 'X' પ્લેટફોર્મ પર માનવતા વિરુદ્ધના ગુનાઓને નકારવામાં આવે છે અને ખોટી સામગ્રીને ફેલાવવામાં 'X'ના અલ્ગોરિધમની સંડોવણી છે. ખાસ કરીને કંપનીના AI ચેટબોટ 'ગ્રોક' (Grok) દ્વારા ડેટાના દુરુપયોગ અને પક્ષપાતી અલ્ગોરિધમ અંગેની ફરિયાદો બાદ તપાસનો વ્યાપ વધારવામાં આવ્યો છે.

એલોન મસ્કનો પલટવાર:

આ મામલે એલોન મસ્ક, સીઈઓ લિન્ડા યાકારિનો અને અન્ય કર્મચારીઓને 20 એપ્રિલના રોજ સુનાવણી માટે હાજર રહેવા આદેશ અપાયો છે. જોકે, મસ્કે આ આક્ષેપોને નકારી કાઢતા ફ્રેન્ચ અધિકારીઓ પર 'રાજકીય રીતે પ્રેરિત તપાસ' કરવાનો વળતો પ્રહાર કર્યો છે. બીજી તરફ, ફ્રેન્ચ ધારાસભ્ય એરિક બોથોરેલે કહ્યું છે કે, "ફ્રાન્સમાં કાયદો સર્વોપરી છે અને કોઈ પણ વ્યક્તિ કે કંપની કાયદાથી ઉપર નથી."

પ્લેટફોર્મ છોડવાનો ટ્રેન્ડ:

આ વિવાદ એટલો વકર્યો છે કે પેરિસ પ્રોસિક્યુટર ઓફિસે પોતે જ 'X' પ્લેટફોર્મ છોડવાની જાહેરાત કરી દીધી છે. હવેથી તેમના તમામ સત્તાવાર સંદેશાવ્યવહાર LinkedIn અને Instagram પર કરવામાં આવશે. પ્લેટફોર્મ પર કન્ટેન્ટ મોડરેશન (સામગ્રીની ચકાસણી) માં નિષ્ફળતા બદલ યુરોપિયન યુનિયન પણ 'X' પર કડક દંડની તૈયારી કરી રહ્યું હોય તેવું જણાય છે.