ઉધમપુર : જમ્મુ અને કાશ્મીરના ઉધમપુર જિલ્લામાં આતંકવાદ વિરુદ્ધ ચાલી રહેલા જંગમાં સુરક્ષા દળોને મોટી સફળતા મળી છે. બુધવારે બસંતગઢ વિસ્તારમાં હાથ ધરવામાં આવેલા 'ઓપરેશન કિયા' (Operation Kia) દરમિયાન ભારતીય સેના, પોલીસ અને CRPF ના સંયુક્ત દળોએ બે પાકિસ્તાની આતંકવાદીઓને ઠાર માર્યા છે. આ આતંકીઓ પાકિસ્તાનથી ઘૂસણખોરી કરીને જંગલોમાં છુપાયા હોવાની શંકા હતી.
કેવી રીતે પાર પડ્યું ઓપરેશન?
બુધવારે બપોરે આશરે 4 વાગ્યે સુરક્ષા દળોને ચોક્કસ ગુપ્ત માહિતી મળી હતી કે રામનગર તહસીલના જોહપર-મારતા ગામના જંગલોમાં આતંકવાદીઓની હિલચાલ જોવા મળી છે. આ માહિતી મળતા જ 'વ્હાઇટ નાઈટ કોર્પ્સ' અને સ્થાનિક પોલીસે સમગ્ર વિસ્તારની ઘેરાબંધી કરી સર્ચ ઓપરેશન શરૂ કર્યું હતું. આતંકવાદીઓએ પોતાને ઘેરાયેલા જોઈને અચાનક સુરક્ષા દળો પર અંધાધૂંધ ગોળીબાર શરૂ કરી દીધો હતો, જેના જવાબમાં જવાનોએ વળતો પ્રહાર કર્યો હતો.
ઘેરાબંધી અને સફળતા
આ એન્કાઉન્ટર એટલું તીવ્ર હતું કે આતંકીઓ ભાગી ન જાય તે માટે જંગલના તમામ બહાર નીકળવાના રસ્તાઓ સીલ કરી દેવામાં આવ્યા હતા અને વધારાની કુમક પણ બોલાવવામાં આવી હતી. કલાકો સુધી ચાલેલી આ લડાઈ બાદ બંને આતંકીઓને ઠાર કરવામાં આવ્યા હતા. સૈન્ય અધિકારીઓના જણાવ્યા મુજબ, આ આતંકીઓ કોઈ મોટા હુમલાની ફિરાકમાં હતા, જે સેનાની સતર્કતાને કારણે નિષ્ફળ બનાવવામાં આવ્યો છે.
સીમાવર્તી વિસ્તારોમાં એલર્ટ
ઉધમપુર ઉપરાંત કિશ્તવાડમાં પણ 'ઓપરેશન ત્રશી-I' ચાલી રહ્યું છે, જ્યાં ગોળીબાર દરમિયાન આઠ સૈન્ય કર્મચારીઓ ઘાયલ થયા હોવાના અહેવાલ છે. આ વિસ્તારમાં હાલમાં સર્ચ ઓપરેશન વધુ તેજ બનાવી દેવામાં આવ્યું છે અને ડ્રોન તથા હેલિકોપ્ટરની મદદથી આતંકીઓના અન્ય ઠેકાણાઓ શોધવામાં આવી રહ્યા છે.