મુંબઈ:  "મેરે સપનો કી રાની કબ આયેગી તૂ..." ગીત વાગે એટલે આપણી નજર સામે જીપમાં બેઠેલા સુપરસ્ટાર રાજેશ ખન્ના આવી જાય. પણ શું તમે ક્યારેય એ વ્યક્તિ પર ધ્યાન આપ્યું છે જે ડ્રાઈવિંગ સીટ પર બેસીને માઉથ ઓર્ગન વગાડતા સ્મિત આપી રહ્યો હતો? તે હતા સુજીત કુમાર. બોલિવૂડ માટે તેઓ ભલે રાજેશ ખન્નાના વફાદાર મિત્ર અને સાઈડ હીરો હતા, પણ યુપી-બિહાર માટે તેઓ 'પહેલા સુપરસ્ટાર' અને ભોજપુરી સિનેમાના 'ભીષ્મ પિતામહ' સાબિત થયા.
વકીલાત છોડીને કેમેરા સામે આવ્યા
વારાણસી નજીક ચકિયામાં જન્મેલા સુજીત કુમાર (મૂળ નામ શમશેર બહાદુર સિંહ) ખરેખર તો LLB નો અભ્યાસ કરી રહ્યા હતા. તેઓ વકીલ બનવા માંગતા હતા, પરંતુ એક નાટક દરમિયાન દિગ્દર્શક ફણી મજુમદારે તેમની પ્રતિભા જોઈ અને તેમને બોમ્બે આવવા પ્રેર્યા. ૧૯૬૦ના દાયકામાં 'લાલ બાંગ્લા' જેવી ફિલ્મોથી તેમણે હિન્દી સિનેમામાં પોતાની ઓળખ બનાવી.
જ્યારે ડૂબતી નૈયાને મળ્યો કિનારો
૭૦ના દાયકામાં ભોજપુરી સિનેમા લગભગ મરવા પડ્યું હતું. ત્યારે ૧૯૭૭માં સુજીત કુમારે ભોજપુરીની પહેલી રંગીન ફિલ્મ 'દંગલ' આપી. આ ફિલ્મે એવો ઈતિહાસ રચ્યો કે તે ભારત ઉપરાંત મોરેશિયસ અને ફીજીમાં પણ સુપરહિટ રહી. તેનું ગીત 'કાશી હિલે પટના હિલે' આજે પણ લગ્ન-પ્રસંગોમાં ધૂમ મચાવે છે. આ સફળતાએ તેમને 'ભોજપુરીના પહેલા સુપરસ્ટાર'નું બિરુદ અપાવ્યું.
રાજેશ ખન્નાના 'લકી ચાર્મ'
હિન્દી ફિલ્મોમાં રાજેશ ખન્ના અને સુજીત કુમારની જોડી સુપરહિટ હતી. 'હાથી મેરે સાથી', 'અમર પ્રેમ', 'અવતાર' અને 'રોટી' જેવી અંદાજે ૧૨ ફિલ્મોમાં તેઓ સાથે દેખાયા. નિર્માતાઓ માનતા કે જો ફિલ્મમાં સુજીત કુમાર હશે તો ફિલ્મ ચોક્કસ સફળ થશે. આ સિવાય તેઓ બોલિવૂડમાં સૌથી વધુ વખત પોલીસ ઓફિસરની ભૂમિકા ભજવનાર અભિનેતાઓમાંના એક પણ હતા.
કેમેરા પાછળનો જાદુ
માત્ર અભિનય જ નહીં, તેમણે 'શિવ ભક્તિ ફિલ્મ્સ' હેઠળ અનિલ કપૂરની 'ખેલ' અને સની દેઓલની 'ચેમ્પિયન' જેવી સફળ ફિલ્મોનું નિર્માણ પણ કર્યું. ૨૦૧૦માં કેન્સર સામેની જંગ હારીને તેઓ વિદાય થયા, પણ ભોજપુરી અને હિન્દી સિનેમામાં તેમનું યોગદાન અમર છે.