મુંબઈ:  ગાયક-સંગીતકાર પલાશ મુછલ અને ભારતીય મહિલા ક્રિકેટર સ્મૃતિ મંધાનાના સંબંધોમાં આવેલા ભંગાણને લઈને સોશિયલ મીડિયા પર અટકળોનું બજાર ગરમ છે. ગયા વર્ષે નવેમ્બરમાં નક્કી થયેલા લગ્ન અચાનક રદ થતા ચાહકો આઘાતમાં હતા. હવે આ મામલે પલાશના ખાસ મિત્ર નંદીશ સંધુએ પ્રતિક્રિયા આપી છે. નંદીશે જણાવ્યું કે, તેણે વર્ષો સુધી આ જોડીને એકબીજાના પ્રેમમાં પાગલ થતા જોઈ છે અને વર્તમાન પરિસ્થિતિ અત્યંત 'દુઃખદ' છે.

પિતાની તબિયત અને લગ્ન મુલતવી

નંદીશે ખુલાસો કર્યો કે તે પોતે પણ આ લગ્નમાં હાજરી આપવાનો હતો, પરંતુ છેલ્લી ઘડીએ બધું બદલાઈ ગયું. તેણે જણાવ્યું કે, "શરૂઆતમાં સ્મૃતિના પિતાની તબિયત ખરાબ હોવાને કારણે લગ્ન મુલતવી રાખવામાં આવ્યા હતા. તેઓ હોસ્પિટલમાં હતા, તેથી પરિવારે આ નિર્ણય લીધો હતો." જોકે, પાછળથી મીડિયા અને સોશિયલ મીડિયા દ્વારા જે વાતો બહાર આવી તેનાથી નંદીશ પોતે પણ અસ્વસ્થ જોવા મળ્યો હતો.

ડિજિટલ બ્રેકઅપ અને સોશિયલ મીડિયા વોર

પલાશ અને સ્મૃતિ વચ્ચેનો વિવાદ હવે જગજાહેર થઈ ગયો છે. પલાશ મુછલે તેના ઇન્સ્ટાગ્રામ પ્રોફાઇલમાંથી સ્મૃતિ મંધાનાના તમામ ફોટા હટાવી દીધા છે, જ્યારે સ્મૃતિએ પણ આ જ પગલું ભર્યું છે. એટલું જ નહીં, પલાશે હવે સ્મૃતિને અનફોલો પણ કરી દીધી છે. સ્મૃતિના એક મિત્ર દ્વારા પલાશ પર લગાવવામાં આવેલા ગંભીર આરોપો બાદ આ જોડી વચ્ચેના સંબંધો વધુ વણસ્યા હોવાનું મનાય છે.

નંદીશ સંધુએ ચાહકોને વિનંતી કરી છે કે તેઓ અફવાઓ પર ધ્યાન ન આપે અને પલાશને પોતે આ મામલે બોલવાની તક આપે. બંને સેલેબ્સ અત્યારે આ મુદ્દે મૌન સેવી રહ્યા છે, જે સસ્પેન્સને વધુ ગાઢ બનાવી રહ્યું છે.