નવી દિલ્‍હી, તા.૫: યુનિયન પબ્‍લિક સર્વિસ કમિશન એ વર્ષ ૨૦૨૬ ની પરીક્ષા માટે જાહેર કરેલી નવી આચારસંહિતાએ હજારો ઉમેદવારો અને સેવામાં રહેલા અધિકારીઓમાં ભારે ઉત્તેજના પેદા કરી છે. નવા નિયમો મુજબ, જે ઉમેદવારો અગાઉની પરીક્ષાઓ પાસ કરીને હાલમાં IAS (ભારતીય વહીવટી સેવા) અથવા IFS (ભારતીય વિદેશ સેવા) માં ફરજ બજાવી રહ્યા છે, તેઓ હવે CSE ૨૦૨૬ ની પરીક્ષામાં બેસવા માટે પાત્ર રહેશે નહીં. આ નિર્ણય પાછળનો મુખ્‍ય હેતુ એ છે કે ઉચ્‍ચ સેવાઓમાં પસંદગી પામ્‍યા બાદ પણ ઉમેદવારો પોતાની કેડર કે રેન્‍ક સુધારવા માટે ફરીથી પરીક્ષા આપે છે, જેના કારણે સરકારનો તાલીમનો ખર્ચ વધે છે અને નવી પ્રતિભાને મળતી તકોમાં ઘટાડો થાય છે. કમિશને સ્‍પષ્ટ કર્યું છે કે આ વખતે કુલ ૯૩૩ જગ્‍યાઓ માટેની ભરતી પ્રક્રિયામાં પારદર્શિતા અને શિસ્‍ત જાળવવામાં આવશે.

બીજા મહત્‍વના ફેરફારમાં IPS (ભારતીય પોલીસ સેવા) માટે પણ કડક જોગવાઈઓ કરવામાં આવી છે. જે ઉમેદવારો પહેલેથી જ IPS તરીકે નિયુક્‍ત છે, તેઓ પરીક્ષા તો આપી શકશે પરંતુ તેમને ફરીથી IPS કેડર ફાળવવામાં આવશે નહીં. એટલે કે, જો તેઓ પોતાની જૂની કેડર બદલવા માટે ફરી પરીક્ષા આપવાનું વિચારતા હોય, તો તેમના માટે આ દરવાજો હવે બંધ થઈ ગયો છે. આ ઉપરાંત, જો કોઈ ઉમેદવાર પ્રિલિમ્‍સ પાસ કરી લે છે પરંતુ મુખ્‍ય પરીક્ષા પહેલા તેની નિમણૂક IAS કે IFS તરીકે થઈ જાય છે, તો તેને મુખ્‍ય પરીક્ષામાં બેસવાની મંજૂરી આપવામાં આવશે નહીં. આ પગલાથી વહીવટી તંત્રમાં સ્‍થિરતા આવશે અને મધ્‍યમ માર્ગ શોધનારા ઉમેદવારોને બદલે ગંભીરતાથી સેવા કરવા ઈચ્‍છતા લોકો જ આગળ વધશે.

ભવિષ્‍યના આયોજન માટે UPSC એ વન-ટાઇમ એક્‍ઝેમ્‍પશન એટલે કે એક વખતની છૂટછાટની જોગવાઈ પણ કરી છે. જે ઉમેદવારો ૨૦૨૫ કે તે પહેલા પસંદ થયા છે, તેમને ૨૦૨૬ કે ૨૦૨૭ ની પરીક્ષા માટે રાજીનામું આપ્‍યા વિના બેસવાની છેલ્લી તક મળશે. જો કે, ૨૦૨૮ પછીની પરીક્ષાઓ માટે સેવામાં રહેલા અધિકારીઓએ ફરજિયાતપણે રાજીનામું આપીને જ મેદાનમાં ઉતરવું પડશે. આ નવા નિયમોએ ખાસ કરીને એવા ઉમેદવારો માટે ચેતવણી સમાન છે જેઓ ટ્રેનિંગ દરમિયાન રજાઓ લઈને ફરી પરીક્ષાની તૈયારીમાં વ્‍યસ્‍ત રહેતા હતા. હવે તાલીમ છોડતા પહેલા સંબંધિત વિભાગની મંજૂરી અનિવાર્ય છે, અન્‍યથા તેમની મૂળ સેવા ફાળવણી પણ રદ થઈ શકે છે.