ઇસ્‍લામાબાદઃ પાકિસ્‍તાનની રાષ્‍ટ્રીય સભાના ભૂતપૂર્વ ડેપ્‍યુટી સ્‍પીકર અને પીટીઆઈ (તહેરીક-એ-ઈન્‍સાફ)ના વરિષ્ઠ નેતા કાસિમ ખાન સુરીનો એક વીડિયો સામે આવ્‍યો છે, જેણે બધાને ચોંકાવી દીધા છે. એક સમયે પાકિસ્‍તાની સંસદના સત્રોનું અધ્‍યક્ષપદ સંભાળી ચૂકેલા સુરીએ ખુલાસો કર્યો છે કે તેઓ હાલમાં પોતાનું ગુજરાન ચલાવવા માટે યુએસમાં ઉબેર ટેક્‍સી ચલાવી રહ્યા છે.

તાજેતરમાં શેર કરાયેલા એક વીડિયોમાં, સુરીએ પોતાની કષ્ટની વાત કરી. તેમણે પોતાની આર્થિક મુશ્‍કેલીઓનો ખુલાસો કર્યો. સુરીએ આરોપ લગાવ્‍યો છે કે જેલમાં બંધ ભૂતપૂર્વ વડા પ્રધાન ઇમરાન ખાનને ટેકો આપવાને કારણે તેમને રાજકીય સતાવણીનો સામનો કરવો પડયો હતો. તેમના મતે, પાકિસ્‍તાન સરકારે તેમની સામે ડઝનબંધ બનાવટી કેસ દાખલ કર્યા, તેમના બેંક ખાતા સ્‍થગિત કર્યા અને તેમની સંપત્તિ જપ્ત કરી. તેમણે એવો પણ દાવો કર્યો કે તેમના પરિવારના સભ્‍યોનું અપહરણ કરવામાં આવ્‍યું હતું, તેમને દેશ છોડવાની ફરજ પડી હતી.  તેમની વર્તમાન નોકરી અંગે, સુરીએ કહ્યું, મેં કયારેય કલ્‍પના નહોતી કરી કે મારે આ કરવું પડશે, પરંતુ તેમાં કોઈ શરમ નથી. તેમણે કહ્યું કે તેઓ ચોરી, ભ્રષ્ટાચાર અથવા ગેરકાયદેસર રીતે મેળવેલા નફા કરતાં સખત મહેનત દ્વારા પૈસા કમાવવાનું પસંદ કરે છે.