મુંબઈ : રિલાયન્સ ના જીઓ સ્ટુડિયો બાદ, હવે જાણીતા ઉદ્યોગસાહસિક અને સર્જનાત્મક પ્રતિભા ધરાવતા અનન્યા બિરલાએ સત્તાવાર રીતે ‘બિરલા સ્ટુડિયો’ (Birla Studios) લોન્ચ કરીને ભારતીય મનોરંજન ક્ષેત્રે પદાર્પણ કરવાની જાહેરાત કરી છે. ભારતના સતત બદલાતા જતા ફિલ્મી ફલક પર આ સ્ટુડિયો હાઈ-કન્સેપ્ટ અને પ્રતિષ્ઠા આધારિત વ્યાપારી સિનેમાને પ્રોત્સાહન આપવાના મક્કમ ઈરાદા સાથે પ્રવેશ કરી રહ્યો છે. આ સાહસ દ્વારા એવી ફિલ્મોનું સર્જન કરવામાં આવશે જે પ્રેક્ષકોમાં આકર્ષણ જમાવવાની સાથે કલાત્મક દ્રષ્ટિએ પણ વિશિષ્ટ હશે.
સંસ્કૃતિ અને સંવેદનાનો સંગમ:
બિરલા સ્ટુડિયોનો મુખ્ય ઉદ્દેશ્ય એવી સાંસ્કૃતિક વાર્તાઓને રૂપેરી પડદે લાવવાનો છે જે પ્રેક્ષકો સાથે ભાવનાત્મક જોડાણ સ્થાપિત કરી શકે અને સમાજ પર લાંબા ગાળાની અસર છોડી શકે. એક તરફ જ્યારે ભારતીય સિનેમા વૈશ્વિક સ્તરે વિવિધ ફોર્મેટ અને અવાજો સાથે વિસ્તરી રહ્યું છે, ત્યારે અનન્યા બિરલાનું આ સાહસ મજબૂત વાર્તાલાપ અને મોટા પાયે નિર્માણ કાર્ય પર ધ્યાન કેન્દ્રિત કરશે.
નવી પ્રતિભાઓને પ્રોત્સાહન:
પોતાના આ નવા સાહસ વિશે વાત કરતા અનન્યા બિરલાએ જણાવ્યું હતું કે, સિનેમા અભિવ્યક્તિનું સૌથી શક્તિશાળી માધ્યમ છે. બિરલા સ્ટુડિયોમાં અમારું ધ્યાન મનોરંજનની સાથે સાંસ્કૃતિક મહત્વ ધરાવતી ફિલ્મો પર રહેશે. આ સાથે જ અમે નવા કલાકારો અને નવી પ્રતિભાઓને ઉછેરવા તેમજ તેમને પ્લેટફોર્મ પૂરું પાડવા માટે સભાનપણે પ્રયાસ કરીશું. તેમણે ફિલ્મ ઉદ્યોગ તરફથી મળેલા પ્રોત્સાહન બદલ આભાર માનતા ઉમેર્યું કે, ભારતીય સિનેમાના ભવિષ્યમાં નાનકડું યોગદાન આપવું એ મારા માટે ગૌરવની વાત છે.
બહુભાષીય આયોજન:
બિરલા સ્ટુડિયોનો એક મુખ્ય આધારસ્તંભ તેની બહુભાષીય વ્યૂહરચના છે. આ સ્ટુડિયો માત્ર હિન્દી પૂરતો સીમિત ન રહેતા ગુજરાતી, મલયાલમ અને અન્ય ભારતીય પ્રાદેશિક ભાષાઓમાં પણ ફિલ્મોનું નિર્માણ કરશે. આ ઉપરાંત, આંતરરાષ્ટ્રીય સ્તરે અંગ્રેજી ભાષાના સિનેમામાં પણ ઝંપલાવવાનું તેનું આયોજન છે. આ અભિગમ દર્શાવે છે કે સ્ટુડિયો સરહદો અને સંસ્કૃતિઓથી પર રહીને પ્રેક્ષકો સાથે જોડાવા માંગે છે. આગામી પ્રોજેક્ટ્સ અંગેની સત્તાવાર જાહેરાતો હવે પછીના મહિનાઓમાં કરવામાં આવશે.