ઢાકા, તા. 6: બાંગ્લાદેશમાં સામાન્ય ચૂંટણીને હવે માત્ર 6 દિવસની વાર છે, ત્યારે રાજધાની ઢાકા ફરી એકવાર હિંસાની લપેટમાં આવી ગઈ છે. મુખ્ય સલાહકાર મોહમ્મદ યુનુસના સત્તાવાર નિવાસસ્થાન 'જમુના' ની બહાર શુક્રવારે સરકારી કર્મચારીઓ અને પોલીસ વચ્ચે ઉગ્ર અથડામણ થઈ હતી. નવમા રાષ્ટ્રીય પગાર ધોરણ (Pay Scale) ના અમલીકરણની માંગ સાથે હજારો પ્રદર્શનકારીઓ રસ્તા પર ઉતરી આવતા સ્થિતિ કાબૂ બહાર ગઈ હતી.
શા માટે ભભૂકી ઉઠી હિંસા?
દેશભરના સરકારી કર્મચારીઓ સવારથી જ શહીદ મિનાર પર એકઠા થયા હતા અને ત્યાંથી ‘જમુના’ નિવાસસ્થાન તરફ કૂચ કરી હતી. પ્રદર્શનકારીઓની માંગ છે કે સરકાર તાત્કાલિક ધોરણે નવમા પગાર પંચના અહેવાલનું ગેઝેટ બહાર પાડે. "પેટમાં ચોખા નથી, તો મોઢા પર વિકાસ કેવો?" જેવા આકરા સૂત્રોચ્ચાર સાથે ભીડ આગળ વધી હતી. સવારે 11:30 વાગ્યે શાહબાગ પાસે જ્યારે પ્રદર્શનકારીઓએ પોલીસ બેરિકેડ તોડ્યા, ત્યારે પોલીસે વળતી કાર્યવાહી શરૂ કરી હતી.
યુદ્ધ જેવી સ્થિતિ: ટીયર ગેસ અને સાઉન્ડ ગ્રેનેડનો મારો
પોલીસે ભીડને વિખેરવા માટે વોટર કેનન (પાણીના તોપ), ટીયર ગેસ અને સાઉન્ડ ગ્રેનેડનો ઉપયોગ કર્યો હતો. સ્થિતિ વધુ વણસતા પોલીસે લાઠીચાર્જ પણ કર્યો, જેમાં અનેક પ્રદર્શનકારીઓ લોહીલુહાણ થયા છે. સુરક્ષાના ભાગરૂપે યુનુસના નિવાસસ્થાનની આસપાસ સેનાના જવાનોને પણ તૈનાત કરવામાં આવ્યા છે. પોલીસ અધિકારી મસૂદ આલમે જ્યારે પ્રદર્શનકારીઓને પૂછ્યું કે "શું તમે ચૂંટણી બગાડવા આવ્યા છો?", ત્યારે મામલો વધુ ગરમાયો હતો.
ચૂંટણી પર તોળાતું જોખમ
શેખ હસીનાના રાજીનામા બાદ રચાયેલી વચગાળાની સરકાર માટે આ વિરોધ મોટો પડકાર બની રહ્યો છે. ગુસ્સે ભરાયેલા કર્મચારીઓએ ચેતવણી આપી છે કે જો તેમના પર અત્યાચાર ચાલુ રહેશે, તો તેઓ આગામી ચૂંટણીનો બહિષ્કાર કરશે. હાલમાં સમગ્ર ઢાકામાં તણાવપૂર્ણ શાંતિ છે અને ભારે પોલીસ કાફલો ખડકી દેવામાં આવ્યો છે. આ હિંસાની અસર 6 દિવસ પછી યોજાનારી ચૂંટણીના પરિણામો અને મતદાન પર કેવી પડશે, તે હવે મોટો સવાલ છે.