નવી દિલ્હી  :  ભારત અને અમેરિકા વચ્ચેના વેપાર કરારોને લઈને સંસદમાં ગરમાવો વધી રહ્યો છે ત્યારે કોંગ્રેસના વરિષ્ઠ નેતા શશિ થરૂરે એક મોટું પગલું ભર્યું છે. વિદેશ બાબતોની સંસદીય સ્થાયી સમિતિના અધ્યક્ષ તરીકે, થરૂરે આગામી ૧૦ ફેબ્રુઆરીએ એક મહત્વપૂર્ણ બેઠક બોલાવી છે, જેમાં વિદેશ મંત્રાલય અને વાણિજ્ય મંત્રાલયના વરિષ્ઠ અધિકારીઓને હાજર રહેવા આદેશ અપાયો છે. આ બેઠકમાં અમેરિકા સાથેના વેપાર સોદાની દરેક ઝીણી વિગતોની સમીક્ષા કરવામાં આવશે. વિપક્ષી દળો ખાસ કરીને અમેરિકી કૃષિ સચિવના નિવેદનોને ટાંકીને સરકારને ઘેરી રહ્યા છે, ત્યારે થરૂરની આ બેઠક સરકાર માટે કસોટી સમાન સાબિત થઈ શકે છે.

આ હાઈ-પ્રોફાઈલ બેઠકમાં માત્ર અમેરિકા જ નહીં, પરંતુ યુરોપિયન યુનિયન (EU) સાથેના મુક્ત વેપાર કરાર (FTA) ની પ્રગતિ અને ભારત-બાંગ્લાદેશના વર્તમાન વણસેલા સંબંધો પર પણ ઊંડી ચર્ચા થવાની શક્યતા છે. શશિ થરૂર તેમની કુશળ રાજદ્વારી સમજ માટે જાણીતા છે, અને તેઓ આ પ્લેટફોર્મનો ઉપયોગ કરીને સરકાર પાસેથી એ જાણવા માંગે છે કે શું આ કરારોથી ભારતના ખેડૂતો અને સ્થાનિક ઉદ્યોગોના હિતો સુરક્ષિત છે કે કેમ. જોકે, રસપ્રદ વાત એ છે કે થરૂરે ભૂતકાળમાં આ અમેરિકી સોદાની પ્રશંસા પણ કરી છે, જેના કારણે રાજકીય વર્તુળોમાં અટકળો તેજ બની છે કે તેઓ સમિતિમાં સરકારનો પક્ષ લેશે કે વિપક્ષનો આક્રમક ચહેરો બનશે.

સંસદના બજેટ સત્ર દરમિયાન યોજાનારી આ સમીક્ષા બેઠક વ્યૂહાત્મક રીતે અત્યંત મહત્વની છે. એક તરફ સરકાર દાવો કરી રહી છે કે આ ડીલ દ્વારા ડેરી અને કૃષિ ક્ષેત્રમાં ભારતના હિતોનું સફળતાપૂર્વક રક્ષણ કરવામાં આવ્યું છે, જ્યારે બીજી તરફ વિપક્ષ તેને 'ખેડૂત વિરોધી' ગણાવી રહ્યો છે. શશિ થરૂરના નેતૃત્વમાં સમિતિના સભ્યો અધિકારીઓની આકરી ઉલટતપાસ કરી શકે છે. ૧૦ ફેબ્રુઆરીએ થનારી આ ચર્ચાના તારણો ભારતની ભાવિ વિદેશ નીતિ અને આર્થિક સંબંધોની દિશા નક્કી કરવામાં મહત્વની ભૂમિકા ભજવશે તે નક્કી છે.