રાજગીર: બિહારના નાલંદા જિલ્લામાં આવેલા પ્રખ્યાત પર્યટન અને ધાર્મિક સ્થળ રાજગીરમાં એક અત્યંત કરુણ ઘટના બની છે. અહીંની દિગંબર જૈન ધર્મશાળાના એક રૂમમાંથી ચાર જૈન પ્રવાસીઓના મૃતદેહ ફાંસીએ લટકેલી હાલતમાં મળી આવતા સમગ્ર પંથકમાં ચકચાર મચી ગઈ છે. મૃતકોમાં બે પુરુષો અને બે મહિલાઓનો સમાવેશ થાય છે, જેઓ કર્ણાટકના બેંગલુરુથી અહીં દર્શન અર્થે આવ્યા હતા.
ધાર્મિક યાત્રાનો કરુણ અંત
મળતી પ્રાથમિક માહિતી મુજબ, આ ચારેય શ્રદ્ધાળુઓ ગત 31 જાન્યુઆરીના રોજ રાજગીર પહોંચ્યા હતા અને ધર્મશાળામાં રોકાયા હતા. સ્ટાફના જણાવ્યા અનુસાર, તેમને છેલ્લે 2 ફેબ્રુઆરીના રોજ જોવામાં આવ્યા હતા. ત્યારપછી તેમનો રૂમ અંદરથી બંધ હતો. શરૂઆતમાં સ્ટાફને લાગ્યું કે તેઓ કદાચ લાંબી યાત્રાએ ગયા હશે અથવા આરામ કરતા હશે, પરંતુ સતત ત્રણ-ચાર દિવસ સુધી દરવાજો ન ખુલતા શંકા પ્રબળ બની હતી.
દુર્ગંધ આવતા ભાંડો ફૂટ્યો
શુક્રવારે સવારે જ્યારે તે રૂમની આસપાસથી અસહ્ય દુર્ગંધ આવવા લાગી, ત્યારે ધર્મશાળાના મેનેજમેન્ટે તાત્કાલિક સ્થાનિક પોલીસને જાણ કરી હતી. પોલીસે ઘટનાસ્થળે પહોંચી દરવાજો તોડ્યો તો અંદરનું દ્રશ્ય જોઈને સૌના હોશ ઉડી ગયા હતા. ચારેય વ્યક્તિઓના મૃતદેહ ફાંસીએ લટકતા હતા. પોલીસે અત્યારે તમામ મૃતદેહોને પોસ્ટમોર્ટમ માટે મોકલી આપ્યા છે અને એફએસએલ (FSL) ની ટીમને તપાસ માટે બોલાવી છે.
પોલીસ હવે એ દિશામાં તપાસ કરી રહી છે કે આ સામૂહિક આત્મહત્યા પાછળનું કારણ શું હોઈ શકે? શું આ કોઈ આર્થિક તંગીનો મામલો છે કે પછી કોઈ ધાર્મિક ઉન્માદમાં લેવાયેલું પગલું? હાલમાં મૃતકોના પરિવારજનોને જાણ કરી દેવામાં આવી છે અને તેમના આગમન બાદ વધુ વિગતો બહાર આવશે. રાજગીર જેવા પવિત્ર સ્થળે બનેલી આ ઘટનાએ સ્થાનીય લોકો અને અન્ય પ્રવાસીઓને સ્તબ્ધ કરી દીધા છે.