પ્યોંગયાંગ: ઉત્તર કોરિયાના ક્રૂર સરમુખત્યાર કિમ જોંગ ઉનના શાસનમાં માનવતા ફરી એકવાર શરમાઈ છે. વિશ્વભરમાં લોકપ્રિય બનેલી દક્ષિણ કોરિયન થ્રિલર શ્રેણી 'સ્ક્વિડ ગેમ' જોવી એ ઉત્તર કોરિયાના કેટલાક હાઈસ્કૂલના વિદ્યાર્થીઓ માટે જીવનની છેલ્લી ભૂલ સાબિત થઈ. એમ્નેસ્ટી ઇન્ટરનેશનલના ચોંકાવનારા અહેવાલ મુજબ, આ કિશોરોએ ગુપ્ત રીતે વિદેશી શ્રેણી જોઈ હતી અને પ્રતિબંધિત K-Pop સંગીત સાંભળ્યું હતું. જ્યારે આ વાતની જાણકારી સત્તાવાળાઓને મળી, ત્યારે કોઈ પણ પ્રકારની દયા દાખવ્યા વગર આ માસૂમ બાળકોને અન્ય વિદ્યાર્થીઓની હાજરીમાં જાહેરમાં ફાંસીના માંચડે લટકાવી દેવામાં આવ્યા હતા.

આ ભયાનક સજા પાછળ કિમ જોંગ ઉનનો વર્ષ 2020નો 'પ્રતિક્રિયા વિરોધી વિચાર અને સંસ્કૃતિ અધિનિયમ' જવાબદાર છે. આ કાયદો એટલો કઠોર છે કે જો કોઈ વ્યક્તિ દક્ષિણ કોરિયન ફિલ્મ કે સંગીત જોતા અથવા વહેંચતા પકડાય, તો તેને મૃત્યુદંડ સિવાય બીજી કોઈ સજા મળતી નથી. અહેવાલો મુજબ, સરકારને ડર છે કે પશ્ચિમી અને દક્ષિણ કોરિયન સંસ્કૃતિ તેમના દેશના યુવાનોના મગજમાં બળવો પેદા કરી શકે છે. આ જ કારણ છે કે માત્ર મનોરંજન માટે કોઈ ફિલ્મ જોવી એ ત્યાં 'રાજદ્રોહ' સમાન ગણાય છે. સાક્ષીઓના જણાવ્યા અનુસાર, 2021માં આ શ્રેણીનું વિતરણ કરનાર વ્યક્તિને પણ ગોળીએ દઈ દેવામાં આવ્યો હતો.

ઉત્તર કોરિયામાં ભયનું વાતાવરણ એટલું ઊંડું છે કે નાની ઉંમરના બાળકોને પણ ફરજિયાતપણે આ ફાંસીના દ્રશ્યો બતાવવામાં આવે છે, જેને સરકાર 'વૈચારિક શિક્ષણ'નું નામ આપે છે. જોકે, આ કાળા કાયદાઓ વચ્ચે પણ ભ્રષ્ટાચાર ફૂલ્યોફાલ્યો છે. પૂર્વ સાક્ષીઓના મતે, જો કોઈની પાસે 5,000 થી 10,000 ડોલરની લાંચ આપવાની ક્ષમતા હોય, તો તે મૃત્યુના મુખમાંથી બચી શકે છે. પરંતુ આર્થિક રીતે નબળા ગરીબ પરિવારોના બાળકો માટે આ કાયદો સીધો મોતનો સામાન બનીને આવે છે. વિશ્વના મંચ પર આ ઘટનાએ કિમ જોંગ ઉનના શાસનની અત્યંત વરવી અને લોહીયાળ વાસ્તવિકતા ફરી એકવાર ઉજાગર કરી છે.