પ્રયાગરાજ (અલ્હાબાદ): અલ્હાબાદ હાઈકોર્ટે શિક્ષણના અધિકારને લઈને એક સીમાચિહ્નરૂપ ટિપ્પણી કરતા જણાવ્યું છે કે, માત્ર ટેકનિકલ કારણોસર કે વહીવટી ગૂંચવણોને લીધે કોઈ વિદ્યાર્થીના શિક્ષણમાં અવરોધ ઊભો કરી શકાય નહીં. જસ્ટિસ સમિત ગોપાલની સિંગલ બેન્ચે સેન્ટ્રલ બોર્ડ ઓફ સેકન્ડરી એજ્યુકેશન (CBSE) દ્વારા દાખલ કરવામાં આવેલી અરજી પર સુનાવણી કરતા બુલંદશહેરના એક વિદ્યાર્થીને ધોરણ 11માં કામચલાઉ પ્રવેશ આપવા આદેશ આપ્યો છે.
આ કેસની વિગત મુજબ, બુલંદશહેરના એક વિદ્યાર્થીને ધોરણ 11માં પ્રવેશ આપવા માટે જ્યુવેનાઈલ જસ્ટિસ બોર્ડ અને પોક્સો કોર્ટે અગાઉ આદેશ આપ્યો હતો. આ આદેશને CBSE બોર્ડે હાઈકોર્ટમાં પડકાર્યો હતો. CBSEની દલીલ હતી કે જ્યુવેનાઈલ જસ્ટિસ બોર્ડની કાર્યવાહીમાં તેમને પક્ષકાર બનાવવામાં આવ્યા નહોતા. જોકે, હાઈકોર્ટે નોંધ્યું કે વિદ્યાર્થી ધોરણ 10 પાસ કરી ચૂક્યો છે અને તે ધોરણ 11માં પ્રવેશ માટે સંપૂર્ણ લાયક છે.
હાઈકોર્ટે કડક શબ્દોમાં કહ્યું કે, કોઈપણ ફોજદારી કેસમાં કથિત સંડોવણીના આધારે વિદ્યાર્થીને શિક્ષણથી વંચિત રાખવો ઉચિત નથી. કોર્ટે દિલ્હી પબ્લિક સ્કૂલ, યમુનાપુરમને નિર્દેશ આપ્યો છે કે વિદ્યાર્થીને આગામી 4 થી 7 દિવસમાં કામચલાઉ પ્રવેશ આપવામાં આવે અને તેને નિયમિત પરીક્ષાઓમાં બેસવાની મંજૂરી પણ આપવામાં આવે. જોકે, કોર્ટે સ્પષ્ટ કર્યું છે કે તેની માર્કશીટમાં આ પ્રવેશ 'કામચલાઉ' હોવાનો ઉલ્લેખ રહેશે અને અંતિમ નિર્ણય હાઈકોર્ટની આ રિટ પિટિશનના ચુકાદાને આધીન રહેશે.
 
હાઈકોર્ટના ચુકાદાના મુખ્ય અંશો:
•    શિક્ષણ સર્વોપરી: કોઈ પણ ટેકનિકલ કે વહીવટી કારણ વિદ્યાર્થીનું વર્ષ બગાડવા માટે પૂરતું નથી.
•    પાત્રતા: જો વિદ્યાર્થી નિયમો મુજબ પાત્ર હોય, તો શાળા કે બોર્ડ તેને એડમિશન આપતા અટકાવી શકે નહીં.
•    કામચલાઉ રાહત: વિદ્યાર્થીનું ભણતર ન બગડે તે હેતુથી તેને તાત્કાલિક ધોરણે ક્લાસમાં બેસવા અને પરીક્ષા આપવાની મંજૂરી અપાઈ.