કુઆલાલંપુર: વડાપ્રધાન નરેન્દ્ર મોદીની મલેશિયાની બે દિવસીય સત્તાવાર મુલાકાતનો પ્રથમ દિવસ ઐતિહાસિક રહ્યો હતો. કુઆલાલંપુરમાં આયોજિત 'સેલામત દાતાંગ મોદી જી' કાર્યક્રમમાં વડાપ્રધાને ભારત-મલેશિયાની ભાગીદારી માટે નવો મંત્ર 'IMPACT' આપ્યો હતો. પીએમ મોદીએ જણાવ્યું કે આ મુલાકાત માત્ર ડિપ્લોમસી પૂરતી નથી, પરંતુ બંને દેશોના લોકો વચ્ચેના અતૂટ સંબંધોનો સેતુ છે.

 ભારતીય સમુદાય માટે ભેટોની લહાણી

પીએમ મોદીએ મલેશિયામાં વસતા 15,000 થી વધુ ભારતીયોને સંબોધતા કેટલીક મહત્વપૂર્ણ જાહેરાતો કરી હતી:

• OCI કાર્ડમાં રાહત: ઓવરસીઝ સિટીઝન ઓફ ઇન્ડિયા (OCI) કાર્ડની સુવિધા હવે 6ઠ્ઠી પેઢી સુધી લંબાવવામાં આવી છે.
• તિરુવલ્લુવર શિષ્યવૃત્તિ: ભારતમાં અભ્યાસ કરવા ઈચ્છતા મલેશિયાના વિદ્યાર્થીઓ માટે ખાસ શિષ્યવૃત્તિ યોજના શરૂ કરવામાં આવી છે.
• નવું કોન્સ્યુલેટ: મલેશિયામાં ભારતીયોની સુવિધા માટે ટૂંક સમયમાં એક નવું ભારતીય કોન્સ્યુલેટ (દૂતાવાસની કચેરી) ખોલવામાં આવશે.

મિત્રતા અને વિશ્વાસનો 'જીવંત પુલ'

પીએમ મોદી અને મલેશિયાના પીએમ અનવર ઇબ્રાહિમે એકબીજાના વખાણ કરી બંને દેશો વચ્ચે વધતી જતી આત્મીયતાનો પરિચય આપ્યો હતો. પીએમ મોદીએ કહ્યું કે, "આજે 'ટ્રસ્ટ' (વિશ્વાસ) ભારતનું સૌથી મોટું ચલણ છે." તેમણે એ પણ નોંધ્યું કે મલેશિયામાં 100 થી વધુ ભારતીય IT કંપનીઓ કાર્યરત છે, જે હજારો લોકોને રોજગારી આપી રહી છે.

વૈશ્વિક મંચ પર ભારતનો દબદબો

સંબોધન દરમિયાન પીએમ મોદીએ ભારતના આંતરરાષ્ટ્રીય સ્તરના બદલાતા ચિત્રનો ઉલ્લેખ કર્યો હતો:

1. ભારત વિશ્વનો બીજો સૌથી મોટો મોબાઈલ ઉત્પાદક દેશ બન્યો છે.
2. સંરક્ષણ નિકાસમાં અભૂતપૂર્વ વધારો થયો છે.
3. યુકે, યુરોપિયન યુનિયન અને યુએસએ જેવા દેશો હવે ભારત સાથે વેપાર કરવા ઉત્સુક છે.

આગામી પગલું: આવતીકાલે મુલાકાતના બીજા દિવસે બંને દેશો વચ્ચે અનેક મહત્વપૂર્ણ કરારો (MoUs) પર હસ્તાક્ષર થશે, જેમાં સંરક્ષણ અને વેપાર મુખ્ય કેન્દ્ર સ્થાને રહેશે.