રેવા: મધ્યપ્રદેશના રેવા જિલ્લામાં શનિવારે સાંજે એક હૃદયદ્રાવક અકસ્માત સર્જાયો હતો, જેમાં એક હસતો-રમતો પરિવાર વિખેરાઈ ગયો છે. હાઈવે પર રાયપુર કરચુલિયાન પોલીસ સ્ટેશન વિસ્તારના કોસ્તા ગામ પાસે પૂરપાટ ઝડપે આવતી એક લક્ઝરી ઓડી કારે મોટરસાઇકલને જોરદાર ટક્કર મારી હતી. આ ગમખ્વાર અકસ્માતમાં પિતા ભાગવત વિશ્વકર્મા અને તેમના નાના પુત્ર રાહુલ સહિત કુલ ત્રણ લોકોના ઘટનાસ્થળે જ કરુણ મોત નીપજ્યા હતા. લોહીલુહાણ હાલતમાં પડેલા મૃતદેહો અને બાઇકના ફુરચા ઉડી ગયેલા દ્રશ્યો જોઈને સ્થાનિકોના કાળજા કંપી ઉઠ્યા હતા.
આ ઘટના પાછળની કરુણતા એ છે કે આ પરિવારના ઘરમાં આગામી ૨૪ ફેબ્રુઆરીએ મોટા પુત્રના લગ્ન લેવાયા હતા. ઘરમાં લગ્નની તૈયારીઓ જોરશોરથી ચાલી રહી હતી અને પિતા-પુત્ર પોતાના સંબંધીઓને આ શુભ પ્રસંગમાં સામેલ કરવા માટે કંકોત્રી આપવા નીકળ્યા હતા. એક જ બાઇક પર સવાર થઈને ખુશીઓ વહેંચવા નીકળેલા પિતા, પુત્ર અને એક સંબંધીને કદાચ અંદાજ પણ નહીં હોય કે હાઈવે પર મોત તેમની રાહ જોઈ રહ્યું છે. અકસ્માતને પગલે લગ્નનું ઘર હવે માતમી સન્નાટામાં ડૂબી ગયું છે.
પોલીસ અધિકારી વિજય સિંહે ઘટનાની વિગતો આપતા જણાવ્યું હતું કે, રાયપુર કરચુલિયાન બાજુથી આવતી ઓડી કારની ગતિ એટલી પ્રચંડ હતી કે ટક્કર લાગતાની સાથે જ બાઇક સવારો હવામાં ફંગોળાયા હતા. ટક્કર એટલી ભયાનક હતી કે બાઇક સંપૂર્ણપણે ક્ષતિગ્રસ્ત થઈ ગઈ હતી અને તેની ઓળખ કરવી પણ મુશ્કેલ બની ગઈ હતી. ટક્કરના અવાજથી આસપાસના લોકો દોડી આવ્યા હતા, પરંતુ ત્યાં સુધીમાં ત્રણેય જિંદગીએ દમ તોડી દીધો હતો. હાઈવે પર વિખરાયેલી લગ્નની કંકોત્રીઓ અકસ્માતની કરુણતાની સાક્ષી પૂરી રહી હતી.
ઘટનાની જાણ થતા જ પોલીસ કાફલો સ્થળ પર પહોંચ્યો હતો અને મૃતદેહોને પોસ્ટમોર્ટમ માટે ખસેડ્યા હતા. પોલીસે આ મામલે ત્વરિત કાર્યવાહી કરતા ઓડી કારના ચાલકની અટકાયત કરી લીધી છે અને કારને પણ કબજે કરવામાં આવી છે. હાલમાં પોલીસ એ તપાસ કરી રહી છે કે અકસ્માત સમયે કારની ઝડપ કેટલી હતી અને શું ચાલક નશાની હાલતમાં હતો કે કેમ. એક તરફ પોલીસે તપાસનો ધમધમાટ તેજ કર્યો છે, તો બીજી તરફ આખા ગામમાં આ દુખદ ઘટનાને લઈને શોક વ્યાપી ગયો છે.