કિવ: રશિયા અને યુક્રેન વચ્ચે છેલ્લા ચાર વર્ષથી ચાલી રહેલા વિનાશક યુદ્ધનો અંત લાવવા માટે હવે અમેરિકાએ કમર કસી છે. યુક્રેનના રાષ્ટ્રપતિ વોલોડીમીર ઝેલેન્સકીએ શુક્રવારે એક પત્રકાર પરિષદમાં મોટો દાવો કર્યો છે કે અમેરિકા જૂન ૨૦૨૬ સુધીમાં કોઈપણ ભોગે શાંતિ કરાર પૂર્ણ કરવા ઈચ્છે છે. ઝેલેન્સકીના મતે, ટ્રમ્પ વહીવટીતંત્ર દ્વારા વાટાઘાટો માટે સ્પષ્ટ સમયમર્યાદા નક્કી કરવામાં આવી છે. જો નિર્ધારિત સમય સુધીમાં રશિયા અને યુક્રેન વચ્ચે સર્વસંમતિ નહીં સધાય, તો અમેરિકા બંને દેશો પર કડક દબાણ લાવી શકે છે, જેનાથી વૈશ્વિક રાજકારણમાં નવા સમીકરણો રચાઈ શકે છે.

અત્યાર સુધી અબુ ધાબીમાં રશિયા, યુક્રેન અને અમેરિકા વચ્ચે મધ્યસ્થી હેઠળ થયેલી વાટાઘાટોમાં કોઈ ખાસ સફળતા મળી નથી. મુખ્ય અવરોધ જમીન વિભાજન અને સુરક્ષા ગેરંટીનો છે. રશિયા પૂર્વીય ડોનબાસ ક્ષેત્ર પર પોતાનું સંપૂર્ણ નિયંત્રણ ઈચ્છે છે, જેને યુક્રેને સખત શબ્દોમાં નકારી કાઢ્યું છે. વધુમાં, રશિયાના કબજા હેઠળના ઝાપોરિઝ્ઝિયા પરમાણુ પ્લાન્ટનો મુદ્દો પણ હજુ વણઉકેલાયો છે. હવે આ ગડમથલનો ઉકેલ લાવવા માટે અમેરિકાએ આવતા અઠવાડિયે મિયામીમાં શાંતિ વાટાઘાટોનો નવો રાઉન્ડ યોજવાનો પ્રસ્તાવ મૂક્યો છે, જેમાં યુક્રેને હાજરી આપવાની પુષ્ટિ કરી દીધી છે.

યુદ્ધના મેદાનમાં સ્થિતિ હજુ પણ ગંભીર છે. રશિયા દ્વારા યુક્રેનના ઊર્જા માળખા પર સતત હુમલા કરવામાં આવી રહ્યા છે, જેના કારણે શિયાળામાં યુક્રેનવાસીઓને વીજળીની ભારે અછતનો સામનો કરવો પડી રહ્યો છે. અમેરિકાએ માનવીય ધોરણે ઊર્જા સ્થાપનો પરના હુમલા રોકવા માટે તાત્કાલિક યુદ્ધવિરામનો સૂચન કર્યું છે. યુક્રેને આ દરખાસ્ત પર સંમતિ દર્શાવી છે, પરંતુ રશિયા તરફથી હજુ સુધી મૌન જાળવવામાં આવ્યું છે. આ અનિશ્ચિતતા વચ્ચે રશિયન સૈન્યની આક્રમકતા અટકવાનું નામ નથી લઈ રહી, જે શાંતિ પ્રક્રિયામાં મોટો અવરોધ સાબિત થઈ શકે છે.

શનિવારે યુક્રેનના પાવલોહરાડમાં થયેલા એક ભયાનક ડ્રોન હુમલાએ શાંતિની આશા પર પાણી ફેરવી દીધું છે. ખાણકામ કરનારા મજૂરોને લઈ જતી બસ પર રશિયન ડ્રોન ત્રાટકતા ૧૫ લોકોના કમકમાટીભર્યા મોત નીપજ્યા છે અને અન્ય ૭ લોકો ગંભીર રીતે ઘાયલ થયા છે. આ હુમલા બાદ બસમાં લાગેલી આગે આખા વિસ્તારમાં ભયનો માહોલ પેદા કર્યો છે. એક તરફ મિયામીમાં શાંતિની તૈયારીઓ ચાલી રહી છે અને બીજી તરફ નિર્દોષ નાગરિકોના લોહી વહી રહ્યા છે, તે જોતા જૂન સુધીમાં શાંતિ સ્થાપવાનું અમેરિકાનું લક્ષ્ય કેટલું સફળ રહેશે તેના પર સમગ્ર વિશ્વની નજર છે.