વોશિંગ્ટન:  અમેરિકાના રાષ્ટ્રપતિ ડોનાલ્ડ ટ્રમ્પના વહીવટીતંત્રે ઇમિગ્રેશનના કડક કાયદાઓ લાગુ કરવાની દિશામાં એક મોટી સફળતા મેળવી છે. યુએસની '૫મી સર્કિટ કોર્ટ ઓફ અપીલ્સ' એ એક ઐતિહાસિક અને વિવાદાસ્પદ ચુકાદામાં ટ્રમ્પ સરકારની તે નીતિને સમર્થન આપ્યું છે, જે અંતર્ગત ગેરકાયદેસર રીતે રહેતા ઇમિગ્રન્ટ્સને બોન્ડ (જામીન) આપ્યા વગર જ લાંબા સમય સુધી અટકાયતમાં રાખી શકાય છે. આ નિર્ણયને કારણે અગાઉના અનેક નીચલી અદાલતોના આદેશો રદબાતલ થઈ ગયા છે.

૩૦ વર્ષ જૂની પરંપરાનો અંત

છેલ્લા ત્રણ દાયકાથી અમેરિકામાં એવી વ્યવસ્થા હતી કે જે ઇમિગ્રન્ટ્સનો કોઈ ગુનાહિત રેકોર્ડ ન હોય અને તેઓ ભાગી જવાનું જોખમ ન ધરાવતા હોય, તેમને ઇમિગ્રેશન કોર્ટમાં બોન્ડ માટે અરજી કરવાની તક મળતી હતી. પરંતુ ટ્રમ્પ વહીવટીતંત્રે આ પ્રથાને ઉલટાવી દીધી છે. કોર્ટે ૨-૧ની બહુમતીથી સ્વીકાર્યું છે કે સરકાર પાસે 'બિન-પ્રવેશિત એલિયન્સ'ને જામીન વગર અટકાયતમાં રાખવાની સંપૂર્ણ સત્તા છે, પછી ભલે તેઓ વર્ષોથી અમેરિકામાં રહેતા હોય.

માનવીય અભિગમ વિરુદ્ધ કાયદાનું કડક અર્થઘટન

ન્યાયાધીશ એડિથ એચ. જોન્સે બહુમતી અભિપ્રાયમાં લખ્યું કે, અગાઉની સરકારોએ પોતાની સત્તાનો ઓછો ઉપયોગ કર્યો એનો અર્થ એ નથી કે સરકાર પાસે વધુ કડક પગલાં લેવાની સત્તા નથી. બીજી તરફ, અસંમત ન્યાયાધીશ ડાના એમ. ડગ્લાસે આ નિર્ણયની ટીકા કરતા કહ્યું કે, આનાથી લાખો લોકો પ્રભાવિત થશે જેઓ અમેરિકન નાગરિકોના માતા-પિતા કે જીવનસાથી છે. તેમણે આ નીતિને 'એક્ઝિક્યુટિવ ફિયાટ' એટલે કે સરમુખત્યારશાહી આદેશ ગણાવ્યો હતો.

અમેરિકાને સુરક્ષિત બનાવવાની દિશામાં મોટું ડગલું

અમેરિકાના એટર્ની જનરલ પામ બોન્ડીએ આ ચુકાદાને આવકાર્યો છે. તેમણે સોશિયલ મીડિયા પર લખ્યું કે, "આ નિર્ણય તે 'કાર્યકર્તા ન્યાયાધીશો' (Activist Judges) સામે એક જોરદાર ફટકો છે જેઓ અમેરિકાને સુરક્ષિત કરવાના ટ્રમ્પના પ્રયાસોમાં અવરોધ ઊભો કરે છે." આ નિર્ણય બાદ હવે ઇમિગ્રેશન એજન્સીઓ કોઈપણ પ્રકારની બાંધછોડ વગર ધરપકડ કરાયેલા લોકોને જેલમાં રાખી શકશે.

ભારતીયો માટે ચિંતાનો વિષય?

અમેરિકામાં મોટી સંખ્યામાં ભારતીયો પણ વગર દસ્તાવેજે વસે છે. અત્યાર સુધી જેમને પકડવામાં આવતા હતા, તેઓ બોન્ડ પર છૂટીને પોતાના કેસ લડી શકતા હતા. પરંતુ હવે જો તેમની ધરપકડ થાય, તો જામીન મળવા મુશ્કેલ બનશે અને તેમને જેલના સળિયા પાછળ લાંબો સમય વિતાવવો પડી શકે છે અથવા સીધા જ ડિપોર્ટ (દેશનિકાલ) કરી શકાય છે.