બાર્સેલોના: જો તમે આ ફેબ્રુઆરીમાં યુરોપના પ્રવાસે જવાનું વિચારી રહ્યા હોવ, તો સ્પેનનું બાર્સેલોના શહેર તમારા માટે એક અદભૂત ભેટ લઈને આવ્યું છે. શહેરના આઇકોનિક અને સ્થાપત્ય કલાના અજોડ નમૂના સમાન 'સાગરાડા ફેમિલિયા' (Sagrada Familia) બેસિલિકા દ્વારા મુલાકાતીઓ માટે ૮,૫૦૦ મફત પ્રવેશ ટિકિટોની જાહેરાત કરવામાં આવી છે. આ ખાસ પહેલ શહેરના વાર્ષિક શિયાળુ ઉત્સવ 'ફેસ્ટા સાન્ટા યુલિયા'ના ભાગરૂપે લેવામાં આવી છે.

૧૪ અને ૧૫ ફેબ્રુઆરીએ મળશે મફત પ્રવેશ

આ મફત ટિકિટો દ્વારા પ્રવાસીઓ ૧૪ અને ૧૫ ફેબ્રુઆરીના રોજ આ ભવ્ય બેસિલિકાની મુલાકાત લઈ શકશે. ૧૪ ફેબ્રુઆરીએ બપોરે ૩ થી ૫:૩૦ અને ૧૫ ફેબ્રુઆરીએ બપોરે ૩ થી ૭ વાગ્યા વચ્ચેના સમય સ્લોટમાં પ્રવેશ આપવામાં આવશે. આ ટિકિટ ધારકોને માત્ર બેસિલિકા જ નહીં, પરંતુ તેના મ્યુઝિયમ અને હાલમાં જ ખુલેલા અત્યાધુનિક 'ઇમર્સિવ રૂમ' જોવાનો પણ લ્હાવો મળશે.

નોંધણીની પ્રક્રિયા અને વિજેતાઓની જાહેરાત

આ મફત ટિકિટ મેળવવા માટે પ્રવાસીઓએ સાગરાડા ફેમિલિયાની સત્તાવાર વેબસાઇટ પર ફોર્મ ભરીને નોંધણી કરાવવાની હતી. રવિવાર, ૮ ફેબ્રુઆરી સુધી નોંધણી ચાલ્યા બાદ, આજે એટલે કે સોમવાર, ૯ ફેબ્રુઆરીના રોજ નસીબદાર વિજેતાઓની યાદી જાહેર કરવામાં આવશે. દરેક પસંદ થયેલા વિજેતાને કુલ ચાર ટિકિટો આપવામાં આવશે, જેથી તેઓ પરિવાર કે મિત્રો સાથે આ ઐતિહાસિક સ્થાપત્ય માણી શકે.

૨૦૨૬: 'ગૌડી વર્ષ' તરીકેની ઉજવણી

બાર્સેલોના માટે વર્ષ ૨૦૨૬ ખૂબ જ ખાસ છે કારણ કે મહાન આર્કિટેક્ટ એન્ટોની ગૌડીના મૃત્યુના ૧૦૦ વર્ષ પૂર્ણ થતા આ વર્ષને 'ગૌડી વર્ષ' તરીકે જાહેર કરવામાં આવ્યું છે. આ નિમિત્તે જે સ્થાનિક રહેવાસીઓને મફત ટિકિટ નથી મળી, તેમને પ્રવેશ ફીમાં ૫૦ ટકા જેટલું મોટું ડિસ્કાઉન્ટ પણ આપવામાં આવશે. સાગરાડા ફેમિલિયાનું કામ એક સદી કરતા પણ વધુ સમયથી ચાલી રહ્યું છે અને તે વિશ્વના સૌથી સુંદર ચર્ચોમાંનું એક ગણાય છે.