પટના: બિહારની રાજનીતિમાં હંમેશા ચર્ચામાં રહેતા સાંસદ પપ્પુ યાદવની અચાનક થયેલી ધરપકડને પગલે રાજ્યનું રાજકીય તાપમાન વધી ગયું છે. આશ્ચર્યજનક રીતે, રાષ્ટ્રીય જનતા દળ પપ્પુ યાદવના ખુલ્લા સમર્થનમાં આવ્યું છે. RJD ના વરિષ્ઠ નેતા શિવાનંદ તિવારીએ સોશિયલ મીડિયા પર એક પોસ્ટ દ્વારા સરકાર અને ન્યાય વ્યવસ્થા પર આકરા પ્રહારો કરતા આ ધરપકડને ‘નિરાશાજનક’ ગણાવી છે.
 શિવાનંદ તિવારીએ પપ્પુ યાદવને બિહારના રાજકારણનું એક વિશિષ્ટ વ્યક્તિત્વ ગણાવ્યું હતું. તેમણે કહ્યું કે પપ્પુ યાદવ માત્ર નેતા નથી, પણ જનતાના સેવક છે. કોરોના કાળ હોય કે બિહારમાં આવતા ભયાનક પૂર, પપ્પુ યાદવ હંમેશા રસ્તા પર ઉતરીને લોકોની મદદ કરતા જોવા મળ્યા છે. તેમની રાજકીય તાકાતનો અંદાજ એ વાત પરથી લગાવી શકાય છે કે તેઓ ત્રણ વખત અપક્ષ ઉમેદવાર તરીકે જીત્યા છે અને છ વખત લોકસભામાં પહોંચ્યા છે.
RJD નેતાએ આરોપ લગાવ્યો હતો કે વર્ષો જૂના કેસોમાં અચાનક આ રીતે ધરપકડ કરવી એ ન્યાય વ્યવસ્થાની ખામીઓ અને રાજકીય કિન્નાખોરી દર્શાવે છે. જ્યારે કોઈ નેતા જનતામાં લોકપ્રિય થવા લાગે ત્યારે તેને દબાવવા માટે આવી યુક્તિઓ અપનાવવામાં આવે છે. તેમણે આશા વ્યક્ત કરી હતી કે ન્યાયતંત્ર આ બાબતની ગંભીરતા સમજશે અને પપ્પુ યાદવને ટૂંક સમયમાં જામીન મળી જશે.
એક સમયે પપ્પુ યાદવ અને RJD વચ્ચે ખટરાગ જોવા મળતો હતો, પરંતુ જે રીતે હવે RJD તેમના સમર્થનમાં આવ્યું છે, તે જોતા બિહારના આગામી રાજકીય સમીકરણો બદલાય તેવા સંકેતો મળી રહ્યા છે. પપ્પુ યાદવની ધરપકડના વિરોધમાં તેમના સમર્થકોએ અનેક જગ્યાએ દેખાવો પણ શરૂ કર્યા છે, જેના કારણે પ્રશાસન એલર્ટ મોડ પર છે.