મુંબઈ, તા.10: ઝવેરી બજારમાં છેલ્લા કેટલાક સમયથી ચાલી રહેલી સોના અને ચાંદીની તેજીની રફ્તાર પર આજે બ્રેક લાગી છે. મંગળવાર, 10 ફેબ્રુઆરીના રોજ રોકાણકારોએ ઉંચા મથાળે નફો બુક કરવાનું પસંદ કરતા કિંમતી ધાતુઓના ભાવમાં મોટો ઘટાડો જોવા મળ્યો છે. ખાસ કરીને ચાંદીમાં જોરદાર કડાકો બોલાયો છે, જે માત્ર થોડા જ કલાકોમાં પ્રતિ કિલોગ્રામ રૂ. 5,400 થી વધુ ઘટી ગઈ છે.
ચાંદીમાં 2% થી વધુનો ઘટાડો
મલ્ટી કોમોડિટી એક્સચેન્જ (MCX) પર માર્ચ ડિલિવરી માટેની ચાંદી આજે રૂ. 5,422 અથવા 2.06 ટકાના ઘટાડા સાથે રૂ. 2,57,198 પ્રતિ કિલોગ્રામ પર ટ્રેડ થઈ રહી હતી. નોંધનીય છે કે ગઈકાલે ચાંદીમાં રૂ. 12,000 થી વધુનો જંગી ઉછાળો જોવા મળ્યો હતો, જેના કારણે આજે રોકાણકારોએ નફો વસૂલવાનું શરૂ કર્યું છે.
સોનાના ભાવમાં પણ નરમાશ
સોનાના ભાવમાં પણ આજે વેચવાલીનું દબાણ જોવા મળ્યું છે. એપ્રિલ ડિલિવરી માટેનું સોનું રૂ. 677 ઘટીને રૂ. 1,57,389 પ્રતિ 10 ગ્રામ પર પહોંચ્યું છે. નિષ્ણાતોના મતે, આંતરરાષ્ટ્રીય બજારમાં ડોલર ઇન્ડેક્સ મજબૂત થવાને કારણે સોના અને ચાંદીની વૈશ્વિક કિંમતો પર દબાણ સર્જાયું છે. ડોલર ઇન્ડેક્સ 0.09 ટકા વધીને 96.90 થયો છે, જે બુલિયન માર્કેટ માટે નકારાત્મક સંકેત છે.
વૈશ્વિક બજારની સ્થિતિ
આંતરરાષ્ટ્રીય સ્તરે COMEX પર સોનાના વાયદા 0.48 ટકા ઘટીને $5,055 પ્રતિ ઔંસ અને ચાંદી 1.20 ટકા ઘટીને $81.25 પ્રતિ ઔંસ પર આવી ગઈ છે. બ્રોકરેજ કંપનીઓના મતે, બજાર અત્યારે અત્યંત અસ્થિર (Volatile) છે. તાજેતરમાં જોવા મળેલા ઐતિહાસિક ઉછાળા બાદ હવે માર્કેટમાં કરેક્શન જોવા મળી રહ્યું છે, જે ટૂંકા ગાળા માટે ભાવમાં વધ-ઘટ લાવી શકે છે.
સામાન્ય ગ્રાહકો માટે આ ઘટાડો રાહતના સમાચાર બની શકે છે, પરંતુ રોકાણકારોએ અત્યારે 'વેઈટ એન્ડ વોચ'ની નીતિ અપનાવવી જોઈએ તેવું નિષ્ણાતો માની રહ્યા છે.