નવી દિલ્હી : જે કલાકારે વર્ષો સુધી પોતાની 'કોમેડી' થી દુનિયાના આંસુ લૂછ્યા, આજે તે પોતે જ જેલના સળિયા પાછળ આંસુ વહાવી રહ્યો છે. બોલિવૂડના દિગ્ગજ અભિનેતા રાજપાલ યાદવ હાલમાં ૯ કરોડ રૂપિયાના દેવા અને ચેક બાઉન્સના કેસમાં દિલ્હીની તિહાર જેલમાં સજા કાપી રહ્યા છે. ૫ ફેબ્રુઆરી ૨૦૨૬ના રોજ તેમણે આત્મસમર્પણ કર્યું હતું. પરંતુ સવાલ એ થાય છે કે, જે ઉદ્યોગમાં કરોડોની કમાણી થાય છે, ત્યાં ૨૭ વર્ષ આપનાર કલાકાર માટે કોઈએ મદદનો હાથ કેમ ન લંબાવ્યો?
એક ભૂલ અને ૧૬ વર્ષની પીડા
રાજપાલ યાદવના પતનની શરૂઆત ૨૦૧૦માં થઈ હતી, જ્યારે તેમણે અભિનય છોડીને દિગ્દર્શનમાં ઝંપલાવ્યું. તેમણે પોતાની પત્ની રાધા યાદવના નામે ફિલ્મ 'આતા પતા લપતા' બનાવવાનું નક્કી કર્યું. આ માટે તેમણે દિલ્હીની 'મુરલી પ્રોજેક્ટ્સ' નામની કંપની પાસેથી ૫ કરોડ રૂપિયાની લોન લીધી હતી. કમનસીબે, ૨૦૧૨માં રિલીઝ થયેલી આ ફિલ્મ બોક્સ ઓફિસ પર ઊંધા માથે પછડાઈ અને ૧૧ કરોડના ખર્ચે બનેલી ફિલ્મ માત્ર લાખોમાં જ સમેટાઈ ગઈ.
કોર્ટની કડક ટિપ્પણી અને જેલવાસ
લોન ચૂકવવામાં નિષ્ફળતા મળતા ચેક બાઉન્સ થવા લાગ્યા અને કાનૂની લડાઈ શરૂ થઈ. વર્ષો સુધી ચાલેલી આ લડાઈમાં ૨૦૨૪ સુધીમાં દેવું વધીને ૯ કરોડ રૂપિયા થઈ ગયું. દિલ્હી હાઈકોર્ટે વારંવાર તક આપી હોવા છતાં રાજપાલ રકમ જમા કરાવી શક્યા નહીં. જસ્ટિસ સ્વરણ કાંતા શર્માએ કડક શબ્દોમાં કહ્યું કે, "માત્ર સેલિબ્રિટી હોવાના નાતે કોઈને વારંવાર ઉદારતા બતાવી શકાય નહીં." અંતે, ૪ ફેબ્રુઆરીએ તેમની છેલ્લી અરજી ફગાવી દેવામાં આવી અને તેમને જેલ ભેગા થવું પડ્યું.
"મારો કોઈ મિત્ર નથી..."
જેલમાં જતા પહેલા રણવીર સિંહ કે અક્ષય કુમાર જેવા સ્ટાર્સ સાથે સ્ક્રીન શેર કરનાર રાજપાલ અત્યંત ભાવુક દેખાયા હતા. તેમણે હતાશામાં કહ્યું, "સાહેબ, મારે શું કરવું જોઈએ? મારી પાસે પૈસા નથી... અહીં હું એકલો છું, મારો કોઈ મિત્ર નથી." આ શબ્દો બોલિવૂડની ચમક-દમક પાછળના અંધકારને છતો કરે છે. જોકે, સોનુ સૂદ અને ગુરમીત ચૌધરી જેવા કલાકારોએ હવે રાજપાલના સમર્થનમાં અવાજ ઉઠાવ્યો છે, પણ શું તે ઘણું મોડું નથી થઈ ગયું?
શું ફરી હસાવશે 'છોટા ડોન'?
રાજપાલ યાદવે 'ભૂલ ભુલૈયા', 'ઢોલ' અને 'હંગામા' જેવી ફિલ્મોમાં અવિસ્મરણીય પાત્રો ભજવ્યા છે. ચાહકો અત્યારે સોશિયલ મીડિયા પર તેમના માટે પ્રાર્થના કરી રહ્યા છે. આશા છે કે આ મુશ્કેલ સમયમાંથી બહાર આવીને રાજપાલ ફરી એકવાર રૂપેરી પડદે વાપસી કરશે અને પોતાની નિર્દોષ કોમેડીથી લોકોને હસાવશે.