મિલાન : મિલાન એટલે માત્ર ઊંચા બિલ્ડિંગો અને મોંઘી બ્રાન્ડ્સનું શહેર નહીં, પણ પરંપરા અને આધુનિકતાનો અનોખો સંગમ. ૨૦૨૬ના વિન્ટર ઓલિમ્પિક્સના સહ-યજમાન એવા આ શહેરમાં ૨૪ કલાક કેવી રીતે વિતાવવા, તેની અદભૂત ટિપ્સ શહેરના જ બે દિગ્ગજોએ આપી છે.
ચોકલેટનો રાજા અને લક્ઝરી બ્રંચ
દિવસની શરૂઆત સ્વાદિષ્ટ રીતે કરવા માટે જ્યોર્જિયો રોકા 'પેસ્ટિસેરિયા અર્ન્સ્ટ નેમ'ની ભલામણ કરે છે. તેને મિલાનમાં 'ચોકલેટના રાજા' તરીકે ઓળખવામાં આવે છે. જો તમારે કંઈક ખાસ ખાવું હોય, તો 'પોર્ટ્રેટ મિલાનો'નો બ્રંચ બેસ્ટ છે, જ્યાં ફ્લેકી ક્રોસન્ટ પર પીરસવામાં આવતા 'એગ્સ બેનેડિક્ટ' તમારી સવાર સુધારી દેશે. બીજી તરફ, કલાકાર બ્રિજિટ નિડરમેરને ઉત્તર યુરોપિયન સ્ટાઇલના 'એલચી બન' (Cardamom buns) માટે 'સિગ્નોર લિવિટો' બેકરી ખૂબ જ પ્રિય છે.
દોડવું, નહેરો અને આઇકોનિક રિસોટ્ટો
સ્વાસ્થ્ય પ્રત્યે જાગૃત લોકો માટે 'પાર્કો સેમ્પિઓન'ના પહોળા રસ્તાઓ દોડવા માટે ઉત્તમ છે. શહેરના હૃદય સમાન 'નેવિગલી નહેરો' (Navigli Canals) ના કિનારે લટાર મારવી એ પણ એક અનોખો અનુભવ છે. બપોરના ભોજનમાં મિલાનનો પ્રખ્યાત 'રિસોટ્ટો' (Risotto) ચાખવો જ રહ્યો. શેફ ડેવિડ ઓલ્ડાનીની બે-મિશેલિન-સ્ટાર રેસ્ટોરન્ટ 'રિસો ડી'ઓ' માં કેસરની સુગંધ ધરાવતો રિસોટ્ટો પ્રવાસીઓમાં હોટ ફેવરિટ છે.
કલા, સંસ્કૃતિ અને શોપિંગ
બ્રિજિટના મતે, મિલાન એ એક એવી સુંદર સ્ત્રી જેવી છે જેને દેખાડો કરવો પસંદ નથી. લિયોનાર્ડો દા વિન્સીની 'ધ લાસ્ટ સપર' પેઇન્ટિંગ અને ડ્યુઓમો ડી મિલાનોની મુલાકાત લીધા પછી, પ્રવાસીઓએ શહેરની આર્ટ ગેલેરીઓ જેવી કે 'પિનાકોટેકા ડી બ્રેરા' અને 'કાસા મુટિના' ને પણ સમય આપવો જોઈએ. ફેશન પ્રેમીઓ માટે જ્યોર્જિયો અરમાનીની કારકિર્દી પરનો ખાસ શો મે મહિના સુધી ખુલ્લો છે, જે જોવો જ રહ્યો.
રાત્રિનું મિલાન અને ખાસ ડિનર
સાંજ પડતા જ મિલાનનો રંગ બદલાય છે. જો તમને સુશી પસંદ હોય, તો 'નોબુ' રેસ્ટોરન્ટ આજે પણ આઇકોનિક છે. રાત્રિભોજન પછી મિલાનની અસલી રોનક જોવા માટે 'અરમાની પ્રીવે' (Armani Privé) શ્રેષ્ઠ સ્થળ છે, જ્યાં નેગ્રોની અથવા ઇટાલિયન વાઇનનો ગ્લાસ પીતા-પીતા તમે શહેરની ભદ્ર અને ફેશન એલિટ દુનિયાનો ભાગ બની શકો છો.