નવી દિલ્હી: લોકસભામાં બજેટ પરની ચર્ચા દરમિયાન સમાજવાદી પાર્ટીના પ્રમુખ અખિલેશ યાદવે કેન્દ્ર સરકાર અને ઉત્તર પ્રદેશ વહીવટીતંત્ર પર આકરા પ્રહારો કરીને રાજકીય ગરમાવો વધારી દીધો છે. અખિલેશ યાદવે સરકારને આડે હાથ લેતા કટાક્ષ કર્યો કે, "હે ભગવાન! નાણામંત્રી તો રામજીને પણ નથી ઓળખતા." તેમના આ નિવેદનથી ગૃહમાં હોબાળો મચી ગયો હતો, પરંતુ અખિલેશ યાદવે પોતાના પ્રહારો ચાલુ રાખ્યા હતા.
અખિલેશ યાદવે કેન્દ્રીય બજેટને સદંતર 'દિશાહીન' ગણાવતા કહ્યું કે, ભાજપ સરકારના આ બજેટમાં દેશના અસલી પાયા સમાન ગરીબો, ખેડૂતો અને મજૂરો માટે કોઈ ઠોસ જોગવાઈ કરવામાં આવી નથી. તેમણે આક્ષેપ કર્યો કે સરકાર માત્ર મોટા ઉદ્યોગપતિઓના ફાયદા માટે કામ કરી રહી છે, જ્યારે સામાન્ય જનતા મોંઘવારી અને બેરોજગારીમાં પીસાઈ રહી છે.
સત્તા પક્ષના સભ્યોના સતત હસ્તક્ષેપ વચ્ચે બોલતા અખિલેશ યાદવે ગંભીર આરોપ લગાવ્યો કે સરકાર 'આત્મનિર્ભરતા' અને 'સ્વદેશી'ના નારા ભૂલી ગઈ છે. તેમણે કહ્યું, "સરકાર હવે એકતરફી વેપારી કરારો તરફ વળી છે, ખાસ કરીને અમેરિકા સાથેના કરારોમાં ભારતનું હિત જોખમાઈ રહ્યું છે." તેમણે મનરેગા જેવી યોજનાઓના નામ બદલવા અને રામ મંદિર સાથે જોડાયેલા મુદ્દાઓ પર પણ સરકારની નીતિઓની ટીકા કરી હતી.

માત્ર કેન્દ્ર જ નહીં, અખિલેશ યાદવે ઉત્તર પ્રદેશના વહીવટીતંત્ર પર પણ નિશાન સાધ્યું હતું. તેમણે કહ્યું કે રાજ્યમાં કાયદો અને વ્યવસ્થાની સ્થિતિ કથળી રહી છે અને બજેટમાં યુપીના વિકાસ માટે જે વાતો કરવામાં આવી છે તે માત્ર કાગળ પર જ છે.
સંસદમાં અખિલેશ યાદવનો આ 'એંગ્રી અવતાર' અને સરકારને ભીંસમાં લેવાની તેમની શૈલી સોશિયલ મીડિયા પર પણ જોરદાર વાયરલ થઈ રહી છે. વિપક્ષી નેતાઓનું કહેવું છે કે અખિલેશ યાદવે જનતાનો અવાજ ગૃહમાં બુલંદ કર્યો છે.