નવી દિલ્હી: સંસદનું બજેટ સત્ર આજે એક રણમેદાનમાં ફેરવાઈ ગયું હતું. લોકસભામાં વિપક્ષના નેતા રાહુલ ગાંધીએ સરકાર પર "ભારત માતાને વેચી દેવા" ના સનસનીખેજ આક્ષેપો લગાવતા જ શાસક પક્ષે આક્રમક વલણ અખત્યાર કર્યું છે. કેન્દ્રીય સંસદીય બાબતોના મંત્રી કિરેન રિજિજુએ જાહેરાત કરી છે કે રાહુલ ગાંધીએ ગૃહને ગેરમાર્ગે દોરવા માટે પાયાવિહોણા નિવેદનો કર્યા છે, જેના બદલ તેમની વિરુદ્ધ 'વિશેષાધિકાર ભંગ'ની નોટિસ દાખલ કરવામાં આવશે.

 લોકસભામાં બજેટ પરની ચર્ચા દરમિયાન રાહુલ ગાંધીએ ભારત-અમેરિકા વેપાર કરારને લઈને સરકાર પર સીધા પ્રહારો કર્યા હતા. તેમણે અત્યંત કઠોર શબ્દોમાં કહ્યું, "તમે ભારતને વેચી દીધું છે. શું તમને શરમ નથી આવતી? આ ખેડૂતોને કચડી નાખવાનો માર્ગ છે." રાહુલે વધુમાં આરોપ લગાવ્યો કે વડાપ્રધાને ભાજપની નાણાકીય વ્યવસ્થાને બચાવવા માટે અમેરિકા સામે સંપૂર્ણ શરણાગતિ સ્વીકારી લીધી છે.
 રાહુલના ભાષણથી નારાજ કિરેન રિજિજુએ કહ્યું કે, "લોકસભામાં નિયમો ખૂબ જ સ્પષ્ટ છે. જો તમે કોઈ સભ્ય કે વડાપ્રધાન સામે ગંભીર આરોપ લગાવો છો, તો તમારે પૂર્વ સૂચના આપવી જોઈએ અને આરોપ સાબિત કરવો જોઈએ. રાહુલ ગાંધીએ હરદીપ સિંહ પુરી અને વડાપ્રધાન સામે કોઈ પણ આધાર વગર ખોટા નિવેદનો કર્યા છે." રિજિજુએ સ્પીકરને વિનંતી કરી છે કે રાહુલ ગાંધીને ગૃહમાં બોલાવીને તેમના આરોપોના પુરાવા રજૂ કરવા માટે કહેવામાં આવે.
 કેન્દ્રીય મંત્રી પ્રહલાદ જોશીએ પણ રાહુલ ગાંધી પર નિશાન સાધતા કહ્યું કે, "તેમને સંસદીય ભાષાની ખબર નથી. ફક્ત બોલી નાખવાથી સત્ય સાબિત નથી થતું, સંબંધિત દસ્તાવેજો રજૂ કરવા પડે છે. રાહુલે બજેટ સિવાયની તમામ વાતો કરી છે." બીજી તરફ, ભાજપે સ્પષ્ટ કર્યું છે કે બંધારણીય મર્યાદાઓનું ઉલ્લંઘન કરનારા નેતાઓ સામે કાયદેસરની કાર્યવાહી કરવામાં આવશે.
સંસદના ઈતિહાસમાં આ પહેલીવાર નથી જ્યારે રાહુલ ગાંધી અને સરકાર આમને-સામને હોય, પરંતુ "દેશ વેચી દીધો" જેવા ગંભીર નિવેદનોએ હવે કાનૂની અને સંસદીય લડાઈનું સ્વરૂપ ધારણ કરી લીધું છે. હવે જોવાનું એ રહેશે કે શું રાહુલ ગાંધી ગૃહમાં આક્ષેપોના પુરાવા આપી શકશે કે પછી તેમણે સદનની માફી માંગવી પડશે.