નવી દિલ્હી:  ભારતની આર્થિક પ્રગતિ હવે માત્ર શહેરો પૂરતી મર્યાદિત નહીં રહે, કારણ કે હવે ‘ખાખી વર્દી’ વાળા પોસ્ટમેન માત્ર ટપાલ જ નહીં, પણ સમૃદ્ધિના સમાચાર લઈને આવશે. નેશનલ સ્ટોક એક્સચેન્જ (NSE) અને ભારતીય ટપાલ વિભાગ (DoP) એ એક ક્રાંતિકારી કરાર પર હસ્તાક્ષર કર્યા છે, જે હેઠળ દેશના ખૂણેખૂણે મ્યુચ્યુઅલ ફંડની પહોંચ વધારવામાં આવશે. આ ભાગીદારીનો ઉદ્દેશ્ય શેરબજારના રોકાણને એટલું જ સરળ બનાવવાનો છે જેટલું ટપાલ મોકલવું હોય છે. 1,64,000 થી વધુ પોસ્ટ ઓફિસોના વિશાળ નેટવર્ક સાથે, આ યોજના ગ્રામીણ અને અર્ધ-શહેરી વિસ્તારોના લોકો માટે ગેમ-ચેન્જર સાબિત થશે, જેઓ અત્યાર સુધી બેંક એફડી કે રોકડ બચત પર જ નિર્ભર હતા.

આ અનોખી પહેલ હેઠળ, પોસ્ટલ વિભાગના કર્મચારીઓ માત્ર ટપાલ વહેંચનારા નહીં, પણ પ્રમાણિત 'મ્યુચ્યુઅલ ફંડ વિતરકો' (MF Distributors) બનશે. પસંદગીના કર્મચારીઓને NSE અને NISM (નેશનલ ઇન્સ્ટિટ્યૂટ ઓફ સિક્યોરિટીઝ માર્કેટ્સ) દ્વારા કડક તાલીમ આપવામાં આવશે. જરૂરી પ્રમાણપત્રો મેળવ્યા બાદ, આ પોસ્ટમેન ગામડાના ખેડૂતો, મજૂરો અને નાના વેપારીઓને SIP (સિસ્ટમેટિક ઇન્વેસ્ટમેન્ટ પ્લાન) અને લમ્પસમ રોકાણ વિશે સમજાવશે. NSE ની અત્યાધુનિક ઓનલાઈન સિસ્ટમ દ્વારા રોકાણની સમગ્ર પ્રક્રિયા પારદર્શક અને સુરક્ષિત રાખવામાં આવશે, જેથી રોકાણકારોના રક્ષણ સાથે કોઈપણ પ્રકારની છેતરપિંડી ટાળી શકાય.

ટપાલ વિભાગના જનરલ મેનેજર મનીષા બંસલ બાદલ અને NSE ના શ્રીરામ કૃષ્ણન દ્વારા હસ્તાક્ષર કરાયેલ આ કરાર હાલમાં ત્રણ વર્ષ માટે માન્ય રહેશે. આ વ્યૂહાત્મક ભાગીદારી પાછળ ભારત સરકારનું 'નાણાકીય સમાવેશ'  નું વિઝન છુપાયેલું છે. જ્યારે ગામડાનો સામાન્ય માણસ પોસ્ટમેન પર સૌથી વધુ વિશ્વાસ કરે છે, ત્યારે એ જ પોસ્ટમેન દ્વારા મળતી રોકાણની સલાહ લોકોમાં શેરબજાર પ્રત્યેનો ડર દૂર કરશે. આ યોજનાથી ગામડાની બચત હવે ઈક્વિટી માર્કેટમાં વહેતી થશે, જે લાંબા ગાળે સામાન્ય નાગરિકોની સંપત્તિમાં વધારો કરશે અને દેશના અર્થતંત્રને નવી ઊંચાઈઓ પર લઈ જશે.