ખંડવા, તા.૧૨: ખંડવામાં ૨૦ જાન્‍યુઆરીની રાત્રે પોલીસ લાઇનમાં જ બે પોલીસકર્મીઓના ઘરમાં ચોરી થતાં હડકંપ મચી ગયો હતો.

 ચોરો સોના-ચાંદીનાં દાગીના અને રોકડ રકમ લઈ ગયા હતા. આ સામાન્‍ય ચોરીનો કેસ નહોતો, કારણ કે સીધા પોલીસકર્મીઓના ઘરોને જ નિશાન બનાવવામાં આવ્‍યા હતા.

તપાસ શરૂ થઈ, સીસીટીવી ફૂટેજ ચકાસવામાં આવ્‍યા અને એક શંકાસ્‍પદ ચહેરો સામે આવ્‍યો. પકડાયેલા આરોપીનું નામ દીપેશ છે, જે અલીરાજપુર જિલ્લાના રહેવાસી છે. પૂછપરછ દરમિયાન જે વાત બહાર આવી, તે સાંભળીને બધા ચોંકી ગયા. દીપેશે લગભગ ૧૫ વર્ષ પહેલાં થયેલી એક ઘટનાને દિલથી લગાવી લીધી હતી. કહેવાય છે કે, તે સમયે કોઈ પોલીસકર્મી સાથે વિવાદ બાદ તેની પિટાઈ થઈ હતી.

ત્‍યારથી જ તેણે મનમાં બદલો લેવાનું નક્કી કરી લીધું હતું. પણ બદલો લેવાનો તેનો રસ્‍તો ખોટો હતો, તેણે માત્ર પોલીસકર્મીઓના ઘરોને જ નિશાન બનાવવાનું શરૂ કર્યું. દીપેશ ખૂબ ચાલાક રીતે કામ કરતો હતો. જે શહેરમાં ચોરી કરવાની હોય ત્‍યાં પોલીસ લાઇનની આસપાસ ફેરીવાળા કે શાકભાજી વેચનાર બનીને ફરતો. દિવસ દરમિયાન ખાલી મકાન ઓળખી લેતો અને રાત્રે તક મળ્‍યે ચોરી કરી લેતો. પોલીસના જણાવ્‍યા અનુસાર, દીપેશે મધ્‍ય પ્રદેશના અનેક જિલ્લાઓમાં આવી રીતે ચોરીઓ કરી છે.

 જ્‍યારે પોલીસ તેની શોધમાં ઝાબુઆ, અલીરાજપુર અને ધાર સુધી પહોંચી, ત્‍યારે તે વારંવાર પોતાનું ઠેકાણું બદલી રહ્યો હતો. આખરે માહિતી મળી કે તે બુરહાનપુર તરફ છે. ઘેરાબંધી દરમિયાન દીપેશે છત પરથી કૂદીને ભાગવાનો પ્રયાસ કર્યો, પણ ઇજાગ્રસ્‍ત થયો અને ઝડપાઈ ગયો. પોલીસે આરોપી પાસેથી રોકડ રકમ અને કેટલાક દાગીના જપ્ત કર્યા છે. તેના બે સાથીઓની શોધ હજુ ચાલુ છે.  અધિકારીઓ હવે તેની પૂછપરછ કરીને જૂના કેસોની કડીઓ જોડવાનો પ્રયાસ કરી રહ્યા છે