નવી દિલ્હી | તા.12: બાંગ્લાદેશમાં સામાન્ય ચૂંટણીની પૂર્વસંધ્યાએ રાજકીય ગરમાવો ચરમસીમાએ છે, ત્યારે વર્ષોથી દેશનિકાલ ભોગવી રહેલા પ્રખ્યાત લેખિકા તસ્લીમા નસરીને અત્યાર સુધીની સૌથી તીખી ટીકા કરી છે. તેમણે વર્તમાન વચગાળાની સરકારના વડા મુહમ્મદ યુનુસ પર ગંભીર આક્ષેપો કરતા જણાવ્યું છે કે, બાંગ્લાદેશમાં અત્યારે લોકશાહીનો સૂર્યાસ્ત થઈ રહ્યો છે અને ઇસ્લામિક કટ્ટરપંથીઓ રેશમી પડદા પાછળથી સત્તા ચલાવી રહ્યા છે.
"હવે આ એ બાંગ્લાદેશ નથી જેને હું જાણતી હતી"
તસ્લીમા નસરીને ખૂબ જ આકરા શબ્દોમાં કહ્યું કે, બાંગ્લાદેશની વર્તમાન સ્થિતિ ભયાનક છે. જેહાદી વિચારધારા ધરાવતા લોકો સત્તાના કેન્દ્રમાં બેસી ગયા છે. તેમણે આરોપ લગાવ્યો કે ઇસ્લામિક કટ્ટરપંથીઓને જાણીજોઈને સત્તા સોંપવામાં આવી છે. "મને હવે એ બાંગ્લાદેશ દેખાતું નથી જે બિનસાંપ્રદાયિકતાના પાયા પર બન્યું હતું. આજે દરરોજ હિંસા થઈ રહી છે, લઘુમતી હિન્દુઓ અને અન્ય સમુદાયો પર હુમલા થઈ રહ્યા છે," તેમ તેમણે ઉમેર્યું હતું.
ચૂંટણીના બહાને 'ધર્મશાહી' સ્થાપવાનું કાવતરું
લેખિકાએ ચેતવણી આપી છે કે આગામી ચૂંટણીઓ માત્ર એક દેખાવો છે. વાસ્તવમાં આ ચૂંટણીઓનો ઉપયોગ બાંગ્લાદેશને સંપૂર્ણપણે 'ધર્મશાહી' (Theocracy) માં ફેરવવા માટે કરવામાં આવી રહ્યો છે. ઉદારવાદી અવાજો, લેખકો અને વિરોધ પક્ષના સભ્યોને ડરાવી-ધમકાવીને શાંત કરી દેવામાં આવ્યા છે. યુનુસના શાસનમાં કટ્ટરપંથીઓને જે ખુલ્લી છૂટ મળી છે, તેનાથી દેશનું ભવિષ્ય અંધકારમય દેખાઈ રહ્યું છે.
આંતરરાષ્ટ્રીય સ્તરે ચર્ચાનું કેન્દ્ર
તસ્લીમા નસરીનનો આ ઇન્ટરવ્યુ એવા સમયે આવ્યો છે જ્યારે વિશ્વભરની નજર બાંગ્લાદેશની ચૂંટણી પર છે. ભારત સહિતના પડોશી દેશો પણ ત્યાંની અસ્થિરતાને લઈને ચિંતિત છે. તસ્લીમાએ સ્પષ્ટ કર્યું કે જો આ વખતે કટ્ટરપંથીઓ વધુ મજબૂત બનશે, તો માત્ર બાંગ્લાદેશ જ નહીં પણ આખા દક્ષિણ એશિયાની શાંતિ જોખમાશે. આ ઇન્ટરવ્યુએ હવે બાંગ્લાદેશના વહીવટીતંત્ર અને મુહમ્મદ યુનુસની કાર્યશૈલી પર અનેક સવાલો ઉભા કર્યા છે.