ઇસ્લામાબાદ | તા.૧૨: પાકિસ્તાનના ભૂતપૂર્વ વડા પ્રધાન અને દિગ્ગજ ક્રિકેટર ઈમરાન ખાનના સ્વાસ્થ્યને લઈને અત્યંત ચિંતાજનક સમાચાર સામે આવ્યા છે. રાવલપિંડીની આદિયાલા જેલમાં કેદ ૭૩ વર્ષીય ઈમરાન ખાને દાવો કર્યો છે કે જેલના સત્તાધીશોની બેદરકારીને કારણે તેમણે તેમની જમણી આંખની દ્રષ્ટિ લગભગ ગુમાવી દીધી છે. આ મામલે આજે પાકિસ્તાન સુપ્રીમ કોર્ટે કડક વલણ અપનાવતા તાત્કાલિક મેડિકલ બોર્ડની રચના કરી તપાસ કરવા આદેશ આપ્યો છે.
જમણી આંખમાં માત્ર ૧૫ ટકા દ્રષ્ટિ બાકી
સુપ્રીમ કોર્ટમાં રજૂ કરાયેલા અહેવાલ મુજબ, ઈમરાન ખાનના વકીલ સલમાન સફદરે જેલમાં તેમની મુલાકાત લીધા બાદ જણાવ્યું કે ઓક્ટોબર ૨૦૨૫ સુધી ખાનની બંને આંખોની દ્રષ્ટિ એકદમ સામાન્ય હતી. પરંતુ ત્યારબાદ સતત ઝાંખું દેખાવાની ફરિયાદ કરવા છતાં જેલ પ્રશાસને કોઈ ધ્યાન આપ્યું નહીં. અંતે જ્યારે તપાસ થઈ ત્યારે ખબર પડી કે તેમની જમણી આંખમાં લોહીના ગંઠાવા (Blood Clots) જામી ગયા છે અને હવે ત્યાં માત્ર ૧૫ ટકા જેટલું જ દેખાય છે.
કોર્ટનો માનવીય અભિગમ: બાળકો સાથે વાત કરી શકશે ખાન
મુખ્ય ન્યાયાધીશ યાહ્યા આફ્રિદીની આગેવાની હેઠળની બેન્ચે આ મામલે ગંભીરતા દાખવી છે. કોર્ટે સ્પષ્ટ કર્યું કે કેદીના સ્વાસ્થ્યની જવાબદારી રાજ્યની છે. મેડિકલ બોર્ડના આદેશની સાથે જ ન્યાયાધીશે ઈમરાન ખાનને એક મોટી રાહત પણ આપી છે. કોર્ટે આદેશ આપ્યો છે કે ખાનને તેમના બાળકો સાથે ટેલિફોન પર વાત કરવાની મંજૂરી આપવામાં આવે, જે લાંબા સમયથી બંધ હતી.
રાજકીય બદલાખોરી કે સ્વાસ્થ્યની ગંભીરતા?
પીટીઆઈ (PTI) ના સમર્થકો આ ઘટનાને રાજકીય ષડયંત્ર ગણાવી રહ્યા છે. ઓગસ્ટ ૨૦૨૩ થી જેલમાં બંધ ઈમરાન ખાનની રહેવાની સ્થિતિ અને તેમને મળતી તબીબી સુવિધાઓ પર સતત સવાલો ઉઠી રહ્યા છે. વકીલે જણાવ્યું કે ખાનને હોસ્પિટલ લઈ જવાયા અને ઈન્જેક્શન પણ અપાયા, પરંતુ ઘણું મોડું થઈ ગયું હતું. હવે ૧૬ ફેબ્રુઆરી સુધીમાં મેડિકલ બોર્ડની તપાસ બાદ રિપોર્ટ સોંપવાનો રહેશે, જેના પર આખા દેશની નજર ટકેલી છે.