ચંદીગઢ | તા.12: લોકશાહીના ચોથા સ્તંભ સમાન મીડિયાની ભૂમિકા અત્યારના ડિજિટલ યુગમાં કેટલી મહત્વની છે, તે મુદ્દે ચંદીગઢ ખાતે એક વિશેષ વર્કશોપનું આયોજન કરવામાં આવ્યું હતું. કેનેડિયન હાઈ કમિશન અને ‘ન્યૂઝ રીલ એશિયા’ના સહયોગથી આયોજિત આ કાર્યક્રમમાં કેનેડાના ડેપ્યુટી હાઈ કમિશનર માર્ક એલને ભારપૂર્વક જણાવ્યું હતું કે, અસરકારક અને સ્વતંત્ર મીડિયા એ કોઈપણ જીવંત લોકશાહીનો પાયો છે. જો મીડિયા સ્વતંત્ર ન હોય, તો લોકશાહીના પાયા નબળા પડે છે.
સોશિયલ મીડિયાનો વધતો પ્રભાવ અને મીડિયાની આવકમાં ઘટાડો
પોતાના ઉદ્ઘાટન સંબોધનમાં માર્ક એલને રોઇટર્સના સર્વેક્ષણને ટાંકીને એક ચોંકાવનારી હકીકત રજૂ કરી હતી. તેમણે કહ્યું કે, હવે પરંપરાગત પ્રિન્ટ કે ટીવી મીડિયા કરતા સમાચાર માટે સોશિયલ મીડિયા પર લોકોની નિર્ભરતા 58% વધી ગઈ છે. આ પરિવર્તનને કારણે પરંપરાગત મીડિયાના આવકના સ્ત્રોત ઘટ્યા છે અને વિશ્વાસનું સંકટ પણ ઉભું થયું છે. આવા સમયે પત્રકારોએ વધુ જવાબદાર બનીને લોકો સુધી સચોટ માહિતી પહોંચાડવી પડશે.
સકારાત્મક રિપોર્ટિંગથી જનવિશ્વાસ જીતવાની સલાહ
કેનેડિયન ડેપ્યુટી હાઈ કમિશનરે પત્રકારોને સૂચન કર્યું હતું કે, મીડિયાએ માત્ર નકારાત્મકતા પીરસવાને બદલે સામાજિક ચિંતાઓ અને સમાજમાં આવતા સકારાત્મક પરિવર્તનો પર વધુ ધ્યાન આપવું જોઈએ. તેમણે ઉમેર્યું કે, "જ્યારે વાચકો પત્રકારત્વમાં પોતાના જીવનના સકારાત્મક અનુભવો જોશે, ત્યારે જ તેઓ પરંપરાગત મીડિયા સાથે દિલથી જોડાશે અને જાહેર વિશ્વાસ ફરી સ્થાપિત થશે."
દક્ષિણ એશિયા બાદ ભારતમાં છઠ્ઠું વર્કશોપ
નેપાળ, શ્રીલંકા અને બાંગ્લાદેશ જેવા દેશોમાં સફળ આયોજન બાદ ભારતમાં આ છઠ્ઠું ક્ષમતા-નિર્માણ વર્કશોપ હતું. ચંદીગઢ પ્રેસ ક્લબ ખાતે આયોજિત આ બે દિવસીય કાર્યક્રમમાં પ્રિન્ટ, ટીવી અને વેબ પત્રકારત્વ સાથે જોડાયેલા ૨૦૦ જેટલા પત્રકારોએ ભાગ લીધો હતો. પ્રેસ ક્લબના પ્રમુખ સૌરભ દુગ્ગલે માર્ક એલનનું સન્માન કર્યું હતું અને તમામ સહભાગીઓને કેનેડિયન હાઈ કમિશન તરફથી પ્રમાણપત્રો એનાયત કરવામાં આવ્યા હતા.