નવી દિલ્હી: ભારતની રાજધાની નવી દિલ્હી ફરી એકવાર વિશ્વના શક્તિશાળી દેશોના નેતાઓની યજમાની કરવા માટે સજ્જ થઈ રહી છે. આગામી ૧૮ થી ૨૨ ફેબ્રુઆરી દરમિયાન બ્રાઝિલના રાષ્ટ્રપતિ લુઇઝ ઇનાસિયો લુલા દા સિલ્વા ભારતની રાજ્ય મુલાકાતે આવી રહ્યા છે. આ મુલાકાત દરમિયાન તેઓ વડાપ્રધાન નરેન્દ્ર મોદીના ખાસ આમંત્રણ પર ‘ભારત-એઆઈ ઈમ્પેક્ટ સમિટ’માં હાજરી આપશે. એટલું જ નહીં, ફ્રાન્સના રાષ્ટ્રપતિ ઇમેન્યુઅલ મેક્રોન પણ ત્રણ દિવસની સત્તાવાર મુલાકાતે દિલ્હી પહોંચશે, જે દર્શાવે છે કે ભારત હવે વૈશ્વિક ટેકનોલોજી અને કુટનીતિનું એપી સેન્ટર બની રહ્યું છે.
બ્રાઝિલ સાથે મજબૂત થશે વ્યાપારી સંબંધો
વિદેશ મંત્રાલયના પ્રવક્તા રણધીર જયસ્વાલે માહિતી આપી હતી કે રાષ્ટ્રપતિ લુલાની આ મુલાકાત ઐતિહાસિક સાબિત થશે. તેમની સાથે બ્રાઝિલના ૧૪ મંત્રીઓ અને અગ્રણી કંપનીઓના સીઈઓનું મોટું પ્રતિનિધિમંડળ પણ આવી રહ્યું છે. ૨૧ ફેબ્રુઆરીએ પીએમ મોદી અને લુલા દા સિલ્વા વચ્ચે દ્વિપક્ષીય બેઠક યોજાશે, જેમાં સંરક્ષણ, વેપાર અને 'ગ્લોબલ સાઉથ'ના દેશોના ઉત્થાન માટે રણનીતિ ઘડવામાં આવશે. રાષ્ટ્રપતિ દ્રૌપદી મુર્મુ તેમના સન્માનમાં ખાસ ભોજન સમારંભનું પણ આયોજન કરશે.
અમેરિકા અને ટ્રમ્પના ‘શાંતિ બોર્ડ’ પર ભારતનું વલણ
પ્રેસ બ્રીફિંગ દરમિયાન રણધીર જયસ્વાલે ભારત-અમેરિકા વચગાળાના વેપાર કરાર અંગે પણ હકારાત્મક સંકેતો આપ્યા હતા. તેમણે જણાવ્યું કે બંને દેશો હવે આ માળખાને અંતિમ સ્વરૂપ આપવા પર કામ કરી રહ્યા છે. વધુમાં, અમેરિકી રાષ્ટ્રપતિ ડોનાલ્ડ ટ્રમ્પના ‘શાંતિ બોર્ડ’માં જોડાવા માટે ભારતને મળેલા આમંત્રણ અંગે તેમણે કહ્યું કે ભારત અત્યારે આ પ્રસ્તાવની તપાસ કરી રહ્યું છે. ભારતે હંમેશા પશ્ચિમ એશિયા અને ગાઝામાં સ્થિરતા અને શાંતિ માટે સંવાદના રસ્તાનું સમર્થન કર્યું છે.
ચીન અને રશિયા સાથેના સમીકરણો
ભારત અને ચીન વચ્ચેના સંબંધોમાં પણ એક મહત્વનો વળાંક જોવા મળ્યો છે. ચીનના કાર્યકારી ઉપ-વિદેશ પ્રધાને જણાવ્યું છે કે ચીન યુએન સુરક્ષા પરિષદ (UNSC) માં ભારતની કાયમી સભ્યપદની આકાંક્ષાઓનું સન્માન કરે છે. બીજી તરફ, રશિયા સાથેના સંબંધો પર ભાર મૂકતા વિદેશ મંત્રાલયે કહ્યું કે રશિયા સાથે વેપારથી લઈને સંરક્ષણ સુધીના તમામ પાસાઓ પર સહયોગ સતત વધતો રહેશે. બાંગ્લાદેશની ચૂંટણીઓ મુદ્દે ભારતે ફરી એકવાર મુક્ત અને ન્યાયી લોકશાહી પ્રક્રિયાને પોતાનું સમર્થન જાહેર કર્યું છે.
આગામી દિવસોમાં દિલ્હીમાં યોજાનારી આ બેઠકો માત્ર ભારત જ નહીં પરંતુ સમગ્ર વિશ્વના વ્યાપારી અને રાજકીય સમીકરણો પર ઊંડી અસર છોડશે.