ન્યૂયોર્ક: દક્ષિણ અમેરિકા અને કેરેબિયન સમુદ્રના વિસ્તારમાં સુરક્ષા વ્યવસ્થા જાળવી રહેલી અમેરિકન નૌસેનાના બે મુખ્ય જહાજો વચ્ચે મધ્ય સમુદ્રમાં ટક્કર થઈ હોવાની ચોંકાવનારી ઘટના સામે આવી છે. અમેરિકી સધર્ન કમાન્ડ દ્વારા આપવામાં આવેલી સત્તાવાર માહિતી અનુસાર, બુધવારે બપોરે જ્યારે આ જહાજો સમુદ્રમાં ઇંધણ અને અન્ય પુરવઠો મેળવવાની પ્રક્રિયા કરી રહ્યા હતા ત્યારે આ અકસ્માત સર્જાયો હતો. આ ઘટનામાં નૌસેનાના બે જવાનોને સામાન્ય ઈજાઓ પહોંચી છે, જેમને તાત્કાલિક સારવાર માટે ખસેડવામાં આવ્યા હતા. હાલમાં બંને જવાનોની સ્થિતિ સ્થિર હોવાનું જાણવા મળ્યું છે.

મળતી વિગતો મુજબ, આ અકસ્માતમાં સામેલ એક જહાજ અર્લી બર્ક ક્લાસનું ગાઈડેડ મિસાઈલ ડિસ્ટ્રોયર 'યુએસએસ ટ્રક્સટન' (ડીડીજી-૧૦૩) છે, જ્યારે બીજું જહાજ ફાસ્ટ કોમ્બેટ સપોર્ટ શિપ 'યુએસએનએસ સપ્લાય' (ટી-એઓઈ-૬) છે. આ બંને જહાજો દક્ષિણ અમેરિકાના દરિયાકાંઠા પાસે કેરેબિયન સમુદ્રમાં તૈનાત હતા. 

નૌસેનાની પરિભાષામાં જેને 'રિપ્લેનિશમેન્ટ એટ સી' કહેવામાં આવે છે, તે પ્રક્રિયા દરમિયાન આ અકસ્માત થયો હતો. આ એક અત્યંત જટિલ પ્રક્રિયા છે જેમાં બે વિશાળ જહાજોએ ચાલુ સમુદ્રમાં એકબીજાની અત્યંત નજીક સમાંતર ચાલીને પાઈપો અને કેબલ દ્વારા ઇંધણ તથા અન્ય ચીજવસ્તુઓની આપ-લે કરવાની હોય છે. આ દરમિયાન જહાજો વચ્ચેનું અંતર ઘણું ઓછું હોય છે અને સહેજ પણ ગણતરીમાં ભૂલ થાય તો અથડામણની શક્યતા રહેલી હોય છે.

અમેરિકી સધર્ન કમાન્ડના પ્રવક્તા કર્નલ ઈમેન્યુઅલ ઓર્ટિઝે આ ઘટનાની પુષ્ટિ કરતા જણાવ્યું હતું કે, અકસ્માત બાદ બંને જહાજો સુરક્ષિત રીતે આગળ વધી રહ્યા છે અને તેમની દરિયાઈ ક્ષમતાને કોઈ મોટું નુકસાન થયું નથી. 

વોલ સ્ટ્રીટ જર્નલ દ્વારા સૌપ્રથમ આ સમાચાર રિપોર્ટ કરવામાં આવ્યા હતા. આ ઘટના બાદ નૌસેના દ્વારા ઉચ્ચ સ્તરીય તપાસના આદેશ આપવામાં આવ્યા છે. તપાસમાં એ જાણવાનો પ્રયાસ કરવામાં આવશે કે શું આ અકસ્માત ટેકનિકલ ખામીને કારણે થયો હતો કે પછી કોઈ માનવીય ભૂલ જવાબદાર હતી.

મહત્વનું છે કે, તાજેતરના મહિનાઓમાં અમેરિકી પ્રમુખ ડોનાલ્ડ ટ્રમ્પના આદેશથી કેરેબિયન ક્ષેત્રમાં નૌસેનાની હાજરી વધારવામાં આવી છે. ડ્રગ્સની હેરાફેરી રોકવા અને પ્રાદેશિક સુરક્ષા માટે આ વિસ્તારમાં હાલમાં અગિયાર જેટલા અમેરિકન યુદ્ધ જહાજો તૈનાત છે, જેમાં વિમાનવાહક જહાજ યુએસએસ જેરાલ્ડ આર ફોર્ડનો પણ સમાવેશ થાય છે. 

'યુએસએસ ટ્રક્સટન' હજુ ફેબ્રુઆરીના પ્રથમ સપ્તાહમાં જ વર્જિનિયાના નોરફોક પોર્ટ પરથી રવાના થયું હતું. નૌસેનાના જહાજો વચ્ચે આવી ટક્કરની ઘટનાઓ ભાગ્યે જ બનતી હોય છે, પરંતુ જ્યારે આવી ઘટના બને છે ત્યારે તે ગંભીર ચિંતાનો વિષય બને છે. હાલમાં બંને જહાજોના નુકસાનનું આકલન કરવામાં આવી રહ્યું છે અને ત્યારબાદ નક્કી કરવામાં આવશે કે તેઓ તેમનું મિશન ચાલુ રાખશે કે પછી સમારકામ માટે બંદર પર પરત ફરશે.

અમેરિકી નૌસેનાના બે જહાજો વચ્ચે થયેલી આ ટક્કર બાદ અત્યારે કેરેબિયન વિસ્તારમાં સુરક્ષા વ્યવસ્થા અને ઓપરેશનલ પ્રોટોકોલની ફરીથી સમીક્ષા કરવામાં આવી રહી છે.