રાયપુર તા.૧૩: છત્તીસગઢ હાઈકોર્ટે જીવનસાથીઓ વચ્‍ચેના વિવાદો અને છૂટાછેડાના કેસોમાં એક મહત્‍વપૂર્ણ ચુકાદો જારી કર્યો છે. કોર્ટે સ્‍પષ્ટ કર્યું છે કે વોટ્‍સએપ ચેટ અને ફોન કોલ રેકોર્ડિગનો ઉપયોગ હવે વૈવાહિક વિવાદોમાં પુરાવા તરીકે થઈ શકે છે. કેસની સુનાવણી કરતી વખતે, જાસ્‍ટિસ સચિન સિહ રાજપૂતની બેન્‍ચે જણાવ્‍યું હતું કે મોબાઇલ ડેટા સત્‍યને ઉજાગર કરવામાં મદદરૂપ થઈ શકે છે. આ કેસમાં રાયપુરના એક દંપતીનો સમાવેશ થાય છે. પતિએ તેની પત્‍નીથી છૂટાછેડા મેળવવા માટે ફેમિલી કોર્ટમાં અરજી દાખલ કરી હતી. પતિએ આરોપ લગાવ્‍યો હતો કે તેની પત્‍નીનું કોઈ બીજા સાથે અફેર હતું અને આ સાબિત કરવા માટે, તેણે કોર્ટમાં તેના વોટ્‍સએપ ચેટ અને કોલ રેકોર્ડિગ રજૂ કરવાની પરવાનગી માંગી હતી. પત્‍નીએ આનો વિરોધ કરતા દાવો કર્યો કે તેના પતિએ તેનો ફોન હેક કરીને આ માહિતી મેળવી છે, જેનાથી તેની ગોપનીયતાનું ઉલ્‍લંઘન થયું છે. ફેમિલી કોર્ટ પતિ સાથે સંમત થયા પછી, પત્‍નીએ હાઇકોર્ટમાં નિર્ણયને પડકાર્યો.