નવી દિલ્હી: તા. 13  ગુનાહિત પ્રવૃત્તિઓમાં નિર્દોષ બાળકોનો ઢાલ તરીકે ઉપયોગ કરતા તત્વો સામે દિલ્હી હાઈકોર્ટે લાલ આંખ કરી છે. ગેરકાયદેસર દારૂ વેચવાના રેકેટમાં એક માસૂમ બાળકને સામેલ કરનારી મહિલાની આગોતરા જામીન અરજીને કોર્ટે સખત શબ્દોમાં ફગાવી દીધી છે. જસ્ટિસ ગિરીશ કઠપાલિયાએ આ કેસમાં મહત્વની ટિપ્પણી કરતા જણાવ્યું કે, "બાળકોનું ગુનાખોરીમાં શોષણ દિવસે-દિવસે વધી રહ્યું છે અને આવા કિસ્સામાં જામીન આપવાથી સમાજમાં અત્યંત ખોટો સંદેશ જશે."
શું હતો સમગ્ર મામલો?
દિલ્હીના સંગમ વિહાર પોલીસ સ્ટેશનમાં નોંધાયેલી ફરિયાદ મુજબ, પેટ્રોલિંગ કરી રહેલા એક કોન્સ્ટેબલે સાંકડી ગલીમાં ગેરકાયદેસર દારૂ વેચાતો જોયો હતો. પોલીસને જોઈ દારૂ વેચતી મહિલા તો ભાગી ગઈ, પરંતુ સ્થળ પરથી એક નાનું બાળક પકડાયું હતું, જેની પાસેથી દારૂના પાઉચ મળી આવ્યા હતા. તપાસમાં ચોંકાવનારો ખુલાસો થયો કે આ બાળકને અરજદાર મહિલા તેના વતનથી ખાસ આ ગેરકાયદે ધંધામાં વાપરવા માટે દિલ્હી લાવી હતી.
કોર્ટની કડક અવલોકન અને ટિપ્પણી
અરજદારના વકીલે દલીલ કરી હતી કે મહિલા પાસેથી કંઈ જપ્ત થયું નથી, તેથી તેની ધરપકડ બિનજરૂરી છે. જોકે, કોર્ટે આ દલીલને ફગાવતા નીચે મુજબના મુદ્દાઓ પર ભાર મૂક્યો હતો:
•    બાળ તસ્કરીની આશંકા: આ કેસ માત્ર દારૂ વેચવાનો નથી, પણ એક બાળકને તેના વતનથી લાવી ગેરકાયદે કામમાં જોતરવાનો છે.
•    કસ્ટોડિયલ પૂછપરછ જરૂરી: શું આ રીતે અન્ય બાળકોની પણ હેરફેર કરવામાં આવી છે? તે જાણવા માટે આરોપીની કસ્ટડીમાં પૂછપરછ અનિવાર્ય છે.
•    ક્રિમિનલ હિસ્ટ્રી: આરોપી મહિલા કોઈ સામાન્ય ગુનેગાર નથી, તે અગાઉ પણ NDPS એક્ટ સહિત કુલ 17 જેટલા ગુનાઓમાં સંડોવાયેલી છે.
 
સમાજ માટે ખોટો સંકેત
હાઈકોર્ટે સ્પષ્ટ કર્યું કે તપાસ એજન્સીઓ અત્યારે મહિલાના ડિજિટલ ટ્રાન્ઝેક્શન (PhonePe એકાઉન્ટ) ની પણ તપાસ કરી રહી છે જેથી આખા રેકેટના નાણાકીય મૂળ સુધી પહોંચી શકાય. કોર્ટે જણાવ્યું કે જ્યારે કોઈ વ્યક્તિ બાળકોના ભવિષ્ય સાથે ચેડાં કરીને તેમને ગુનાના રસ્તે વાળે છે, ત્યારે તેમને કાયદાકીય રાહત આપવી એ ન્યાયના હિતમાં નથી.
આ ચુકાદો એવા તમામ લોકો માટે ચેતવણી સમાન છે જેઓ કાયદાની પકડથી બચવા માટે બાળકોનો ઉપયોગ કરે છે.