મુંબઈ: તા. 13 બોલિવૂડના દિગ્ગજ અભિનેતા સંજય મિશ્રા પોતાની સાહજિક એક્ટિંગ માટે જાણીતા છે, પરંતુ તાજેતરમાં તેમણે પોતાના અંગત જીવનનો એક એવો કિસ્સો શેર કર્યો છે જે સાંભળીને કોઈ પણની આંખો ભીની થઈ જાય. પિતાના મૃત્યુના આઘાતમાં માણસ કઈ હદ સુધી જઈ શકે છે, તેનું જીવંત ઉદાહરણ સંજય મિશ્રાએ આપ્યું છે. એક ઇન્ટરવ્યુ દરમિયાન તેમણે કબૂલાત કરી હતી કે પિતાના અવસાન બાદ તેઓ એટલા તૂટી ગયા હતા કે તેમણે સ્મશાનમાં જઈને પિતાની ચિતાની રાખ પોતાના આખા શરીર પર લગાવી દીધી હતી.

નશાની હાલતમાં સ્મશાન પહોંચ્યા હતા અભિનેતા

સંજય મિશ્રાએ જણાવ્યું કે તેમના પિતાના અવસાનથી આખો પરિવાર હચમચી ગયો હતો. પિતાને ગુમાવવાનું દુઃખ તેમના માટે અસહ્ય હતું. એ રાત્રે તેઓ ભારે નશામાં હતા અને એ જ હાલતમાં તેઓ અંતિમ સંસ્કાર સ્થળ એટલે કે સ્મશાન પહોંચી ગયા હતા. ત્યાં જઈને તેમણે પિતાની રાખ એકઠી કરી અને જાણે પિતાનો સાથ કાયમ માટે ઝંખતા હોય તેમ તે રાખ પોતાના આખા શરીરે ચોળી દીધી હતી.

સસરા પણ જોઈને ગભરાઈ ગયા

જ્યારે સંજય મિશ્રા આ હાલતમાં ઘરે પરત ફર્યા, ત્યારે તેમના સસરા તેમને જોઈને હેબતાઈ ગયા હતા. આખા શરીરે રાખ લાગેલી અને નશામાં ચૂર સંજય મિશ્રાની સ્થિતિ જોઈને પરિવારના સભ્યોને કંઈ સમજાતું નહોતું. સંજય મિશ્રાએ યાદ કરતા કહ્યું કે, "એ સમયે હું શું કરી રહ્યો હતો તેનું મને ભાન નહોતું, પણ મને બસ એટલું યાદ છે કે હું મારા પિતાને મારી પાસે રાખવા માંગતો હતો."

મુશ્કેલ સમય અને નવી શરૂઆત

આ ઘટના બાદ સંજય મિશ્રા લાંબા સમય સુધી આઘાતમાં રહ્યા હતા અને તેમણે ફિલ્મી દુનિયાથી પણ અંતર જાળવી લીધું હતું. એક સમયે તો તેઓ ઋષિકેશ જઈને ઢાબા પર કામ કરવા લાગ્યા હતા. જોકે, નસીબ તેમને ફરીથી કેમેરા સામે ખેંચી લાવ્યું અને આજે તેઓ સિનેમાના સૌથી આદરણીય કલાકારોમાંના એક છે.

હાલમાં તેમની નવી રહસ્યમય થ્રિલર ફિલ્મમાં નીના ગુપ્તા સાથેની તેમની ભૂમિકાની ખૂબ પ્રશંસા થઈ રહી છે, પરંતુ આ ઇન્ટરવ્યુએ સાબિત કરી દીધું કે પડદા પર લોકોને હસાવનાર આ કલાકારના જીવનમાં દુઃખના કેટલા ઊંડા સાગર છુપાયેલા છે.