મુંબઈ:આજના ડિજિટલ યુગમાં વ્યવસાય ચલાવવો એ માત્ર નફો મેળવવા પૂરતો મર્યાદિત નથી રહ્યો, પરંતુ અદ્રશ્ય સાયબર હુમલાખોરો સામે ટકી રહેવાનો પણ જંગ બની ગયો છે. તાજેતરમાં બહાર આવેલા 'ફિક્કી (FICCI)-EY રિસ્ક સર્વે 2026' મુજબ, ભારતીય ઉદ્યોગ જગતના માંધાતાઓ હવે સાયબર સુરક્ષાને સૌથી ગંભીર ખતરો માની રહ્યા છે. સર્વેમાં સામેલ ૬૧ ટકા બિઝનેસ લીડર્સે સ્વીકાર્યું છે કે સાયબર જોખમો તેમની સંસ્થાની કામગીરી અને ભવિષ્યને નક્કી કરનાર મુખ્ય પરિબળ છે.

AI: વરદાન કે અભિશાપ?

આર્ટિફિશિયલ ઇન્ટેલિજન્સ (AI) ના યુગમાં જેટલી ઝડપથી ટેકનોલોજી વધી રહી છે, તેટલી જ ઝડપથી નવા પ્રકારના જોખમો પણ ઉભા થયા છે. સર્વેના કેટલાક મુખ્ય અંશો:

• ધીમો સ્વીકાર: ૫૯ ટકા એક્ઝિક્યુટિવ્સનું માનવું છે કે AI જેવી નવી ટેકનોલોજી અપનાવવામાં વિલંબ કરવાથી કંપનીની કાર્યક્ષમતાને નુકસાન થઈ રહ્યું છે.
• શાસનનો અભાવ: બીજી તરફ, ૫૪ ટકા નેતાઓ ચિંતિત છે કે AI ના ઉપયોગ સાથે જોડાયેલા નૈતિક મૂલ્યો અને સુરક્ષાના નિયમોનું યોગ્ય પાલન થઈ રહ્યું નથી.

‘ઘરના ભેદી’ લંકા ઢાબે!

સર્વેમાં સૌથી વધુ ચોંકાવનારી વિગત ડેટા ચોરી બાબતે બહાર આવી છે. અડધાથી વધુ બિઝનેસ લીડર્સે સ્વીકાર્યું છે કે તેમને બહારના હેકર્સ કરતા પોતાની કંપનીની અંદરના લોકો (ઇનસાઇડર્સ) દ્વારા થતી ડેટા ચોરી અને છેતરપિંડીનો વધુ ભય છે. આ બાબત સૂચવે છે કે હવે કંપનીઓએ માત્ર મજબૂત ફાયરવોલ જ નહીં, પણ કર્મચારીઓની દેખરેખ અને આંતરિક શિસ્ત પર પણ વધુ ધ્યાન આપવું પડશે.

વ્યવસાયની સ્થિતિસ્થાપકતા માટે ‘ઝીરો ટ્રસ્ટ’ જરૂરી

સાયબર જોખમો હવે માત્ર ટેકનિકલ સમસ્યા નથી રહી, પરંતુ તે સીધી રીતે કંપનીની આવક, તેની પ્રતિષ્ઠા અને ગ્રાહકોના વિશ્વાસને અસર કરી રહી છે. નિષ્ણાતોના મતે, હવે ‘ઝીરો ટ્રસ્ટ’ સુરક્ષા સ્થાપત્ય (Zero Trust Architecture) અપનાવવાનો સમય આવી ગયો છે. સાયબર સુરક્ષાને કંપનીના બોર્ડરૂમમાં મુખ્ય વ્યૂહરચના તરીકે સામેલ કરવી પડશે, નહીં તો આવનારા સમયમાં સાયબર જોખમો સપ્લાય ચેઇન અને સરહદો વટાવીને આખા વ્યવસાયને ઠપ્પ કરી શકે છે.

વ્યવસાયની સાતત્યતા જાળવી રાખવા માટે હવે દરેક નાની-મોટી કંપનીએ સાયબર તૈયારીને પોતાની પ્રાથમિકતા બનાવવી જ પડશે.