ચેન્નાઈ: તમિલનાડુમાં ૨૦૨૬ની વિધાનસભા ચૂંટણીનું બ્યુગલ અત્યારથી જ ફૂંકાઈ ગયું હોય તેવું લાગી રહ્યું છે. મુખ્યમંત્રી એમ.કે. સ્ટાલિને 'કલાઈનાર મહિલા અધિકાર યોજના' હેઠળ રાજ્યની ૧.૩૧ કરોડ મહિલાઓના બેંક ખાતામાં એકસાથે ₹૫,૦૦૦ જમા કરાવતા જ વિપક્ષી પાર્ટી AIADMK અને સત્તાધારી DMK વચ્ચે શાબ્દિક યુદ્ધ છેડાયું છે. AIADMK નેતા એડપ્પડી કે. પલાનીસ્વામી (EPS) એ મુખ્યમંત્રીને 'કઠપૂતળી' કહ્યા, જેના જવાબમાં DMK સાંસદ કનિમોઝી સોમુએ આકરી ટીકા કરી છે.

કનિમોઝીનો પલટવાર: "AIADMK ને મોટો આંચકો લાગ્યો છે"

DMK સાંસદ કનિમોઝીએ જણાવ્યું હતું કે, મુખ્યમંત્રી સ્ટાલિનના આ સક્રિય પગલાથી વિપક્ષી છાવણીમાં ગભરાટ ફેલાયો છે. તેમણે કહ્યું, "અગાઉ AIADMK કહેતી હતી કે ₹૧,૦૦૦ આપવા શક્ય નથી, અને હવે તેઓ પોતે જ પોતાના મેનિફેસ્ટોમાં ₹૨,૦૦૦ આપવાનું વચન આપી રહ્યા છે. આ તેમની હારનો સ્વીકાર છે. ૨૦૨૬ની ચૂંટણીમાં DMK ક્લીન સ્વીપ કરશે અને વિપક્ષના સૂપડા સાફ થઈ જશે."

EPS નો 'ચૂંટણીના ડર'નો આરોપ

બીજી તરફ, AIADMK ના મહાસચિવ પલાનીસ્વામીએ સોશિયલ મીડિયા પર આકરા પ્રહારો કર્યા હતા. તેમણે દાવો કર્યો કે, "ચૂંટણીમાં હારના ડરે 'કઠપૂતળી મુખ્યમંત્રી' ને આ પગલું ભરવા મજબૂર કર્યા છે. જે સરકારે ૨૮ મહિના સુધી પૈસા ચૂકવવામાં આળસ કરી, તે હવે અચાનક 'ઉનાળાના પેકેજ' ના નામે પૈસા વહેંચી રહી છે. શું અગાઉના વર્ષોમાં ઉનાળો નહોતો? આ માત્ર નિષ્ફળતા છુપાવવાનું પેચવર્ક છે."

સીએમ સ્ટાલિનની સ્પષ્ટતા: "અવરોધો છતાં વચન પાળ્યું"

વિવાદ વચ્ચે મુખ્યમંત્રી એમ.કે. સ્ટાલિને સ્પષ્ટતા કરી છે કે આ રકમમાં ફેબ્રુઆરી, માર્ચ અને એપ્રિલના ₹૩,૦૦૦ એડવાન્સ અને ₹૨,૦૦૦નું ખાસ ઉનાળુ પેકેજ સામેલ છે. તેમણે આરોપ લગાવ્યો કે કેટલાક લોકો ચૂંટણીનું બહાનું ધરીને આ ગ્રાન્ટ રોકવાનો પ્રયાસ કરી રહ્યા હતા, તેથી મહિલાઓને કોઈ તકલીફ ન પડે તે માટે સરકારે અગાઉથી જ આ રકમ જમા કરાવી દીધી છે.

તમિલનાડુના આ 'કેશ ટ્રાન્સફર' રાજકારણે ૨૦૨૬ની જંગને અત્યંત રસપ્રદ બનાવી દીધી છે. હવે જોવાનું એ રહેશે કે 'દ્રવિડિયન મોડલ' ની આ સ્કીમ જનતાના મતોમાં પરિવર્તિત થાય છે કે કેમ.